Sunil Chhetri man a to ber

ISL hotu te'n season hmasaa ISL khel lo player ṭhazual 10 auction naah an phochhuak a, an base price aṭanga man to ber chu nuai 85 man Sunil Chhetri a ni.

Player auction neih a ni a, India captain Sunil Chhetri hi Mumbai City FC chuan vaibelchhe 1.2-in an chhang a, Bengaluru FC striker aia man to an awm lo.

India tana goal khung hnem ber an lakluh theih avangin Mumbai City FC neitu Ranbir Kapoor a lawm hle. Bollywood actor lar chuan, "Kan budget neih dan ngaihtuah ran chungin auction hi kan chhim a, hetiang zat leka tlawm hian Chhetri hi kan lakluh theih kan inring lo. Kan tlar hmaa Anelka leh Chhetri inkawp tur hi kan tan chuan mumang thleng dik ang mai a ni," tiin Chhetri man atana vaibelchhe 1.2 an sen chu tam a ti lo.

Barcelona fan ruhkawl Ranbir Kapoor chuan sawi chhunzawmin, "Team ṭha tak din kan duh a, football hmuhnawm tak khel thei tur player kan duh a ni. Nikumah beisei angin kan che ṭha lo a, tunah chuan Chhetri kan neih tawh avangin kan ṭha sawt ang," a ti.

India tan vawi 76 a inlana goal 46 thun thei Chhetri pawh a lawm a, India striker zinga ṭha ber tih ngam Chhetri chuan, "Kum 13 chuang I league-ah tawnhriat ropui tak ka lo nei tawh a, vawiina ISL hi ka tan chuan thil thar leh professional tak, tel ve chakawm tak a ni," tiin ISL chu khelh thuai thuai a chak tawh thu a sawi.

Kum 30-a upa striker Chhetri hi Mumbai City FC-ah Mizo tlangval Lalrindika Ralte, Chelsea striker hlui Nicolas Anelka te nen an khelho dawn a, an chhe lo ang.

Khasi tlangval Eugeneson Lyngdoh-a'n chhangtu a nei huai a, a base price nuai 27.5 ni si kha Pune City FC-in an chan meuh chuan vaibelchhe 1.05 man a ni! Bengaluru FC midfielder hi a base price aia a to na zat hi nuai 77.5 lai a ni.

Auction-a player panga lai thawhtu Bengaluru FC player te'n chhangtu an nei huai a, a base price-a nuai 39 man Manipur tlangval Thoi Singh chu nuai 88-in Mizo tlangval Jeje Lalpekhlua khelhna Chennaiyin FC-in an lei.

I League-a Player of the tournament Jakichand Singh-a'n beisei angin chhangtu a nei huai lo. A base price nuai 20 aṭanga Pune City FC-in an chhanna nuai 45 hi sang tak angin lang mah se auction-a player dang man zat aṭanga chhut chuan a tam lo hle.