Domestic draft-ah Mizo player an langsar

ISL Auction neih zawh a nih hnuah Domestic draft neih leh a ni a, palyer 114 duhthlan tur awm aṭangin ISL club pariat ten an player duhzawng an thlang.

Domestic Draft-ah hian player an tam tham deuh avangin round hrang hrangah ṭhen a ni a, round 1-ah Mizo tlangval Lal­thuammawia Ralte a lang nghal.

Round 1

Champhai tlangval Thuam­mawia hi I League club Bengaluru FC keeper rinrawl a ni a, season hman zawh tak I-League match zawng zawngah a inlan kim vek a, vawi khatmah thlak a ni lo bawk.

NorthEast United FC-in Mizo tlangval theihna hi an hmuh hmaih lo a, nuai 13.9-in an lei.

Round 2

Mumbai City FC-in Lal­chhuanmawia Fanai an lalut ve leh a, Bengaluru FC defender tana Mumbai club pawisa sen zat hi nuai 15 lai a ni. Season hman zawh tak I League match 20-a vawi 16 inlan thei Lengpui tlangval Chhuantea hi tun hnaiah India squad-a koh a ni a, World Cup qualifier-a India-in Oman leh Guam an khelh ṭumin bul a ṭan nghal ve ve a, a khel chhe lo.

Nimina neih zawh tak domestic draft-ah hian player man to ber pawl a ni.

Round 3

Royal Wahingdoh player pahnih Lalchhawnkima leh Lalhmangaihsanga Ralte te Round-3 naah an hming a lang ve leh a, Nikum ISL-a Mizo player pakhatmah neilo Atletico de Kolkata chuan Champhai Kanan tlangval Lalchhawnkima an lalut.

I League khelh zawh taka defender zinga inlan hnem ber Chhawnkima manah hian Atletico de Kolkata chuan nuai 9 an rawn thehchhuak a ni. Chhawnkima hian season hman zawh tak I League-ah khan vawi 20 inkhelh awmah vawi 20 a inlan a, vawi hnih thlak niin inkhel zawng zawngah hian bul a ṭan vek a ni.

Jeje-a khelhna Chennaiyin FC-in Lalhmangaihsanga Ralte an lalut bawk a, Royal Wahingdoh defender man zat hi nuai 9 a ni.

Round 5

Mizo tlangval hming Round 4-ah a lang lo a, Round 5-ah erawh Mizo rawlthar Lalrempuia Fanai a langsar hle. Delhi Dynamos-in nuai 1.8 man Mizo rawlthar Lalrempuia Fanai chu an club-a khel turin an lei a, mahse Pune City FC-in I League lama an khaw club Pune FC midfielder Rempuia hi an duh ve si a, 'instant trade' hmangin nuai 11-in an chang ta a ni.

ISL domestic draft-ah 'instant trade' dan hi hman a ni. Club tinin an player duhzawng thlanna hun an nei ṭheuh a, an player duh kha club dangin an lo duh ve chuan an player thlanna hun kha club dang hnenah second 15 chhunga hlan chhawngin club pahnihte inbiakremnain player hi an inkian ṭhin a ni.

Delhi Dynamos-in player thlanna hun an neihah Rempuia hi an thlang a, mahse Pune City-in an lo duh ve si avangin a hnua an player duhzawng an thlanna tur hun kha Delhi Dynamos hlanchhawngin inbiakremna hmangin Rempuia hi an lalut ta a ni.

ISL domestic draft ṭum hnih neih tawhah 'instant' trade hi hman a la ni ngai lo a, kum 18-a upa Mizo midfielder Lalrempuia lei nana Pune City FC-in an hman hi a vawi khatna a ni.

Round 6 & 7

ISL domestic draft round tawp berah Mizo tlangval hming pahnih ngawt a lang leh. Nikum ISL-a NorthEast United tana inlan Zodingliana Ralte chuan S.Malsawmtluanga te nena khel ho turin Delhi Dynamos lam a pan a, Shillong Lajong midfielder manah hian Roberto Carlos-a enkawl tur Delhi chuan nuai 2 an thehchhuak a ni.

Pune FC defender Zohming­liana Ralte chu NorthEast United-in nuai 9-in an lei bawk a, Aizawl tlangval Zohming­liana hi Thuammawia te nen an khelho dawn tihna a ni.