Ronaldo-a'n ama hma a sial, a ṭangkai tawk lo - Dani Alves

Lionel Messi leh Cristiano Ronaldo khaikhin zel an ni. Ronaldo hi Barcelona defender Dani Alves-a'n mahni hmasialah a chhuah.

Barca defender Dani Alves chuan, "Team tana khel ṭhin ka nih avangin Ronaldo khelh danah hian ngaihsan loh ka nei a ni. Ka hmuh dan chuan Ronaldo hian team aiin amah a indah pawimawh zawk a ni. Keini chu league champion vangin kan lawm a, ani chu Pichichi trophy (La Liga top scorer) dawn vangin a lawm thung," tiin Portugal captain khelh dan a ngaihsan loh thu sawi.

Ronaldo leh Messi khaikhin zuiin Alves chuan, "Messi hi Ronaldo aiin a ṭha daih zawk a ni. Messi chu ball kan inpek kualna kawngah a ṭangkai a, Ronaldo chu a ṭangkai ve lo. Uluk takin chik ula, goal khung leh a chet dan ṭhenkhat bak hi fakna tur a tam lo ang. Messi erawh ṭhiante goal thun tur siam sak kawngah leh goal khung lamah a pawimawh a ni," tiin a sawi.

Brazilian defender chuan sawi zelin, "Messi hi chuan pianpui thiamna a nei a, Ronaldo hi chu thawhrim rah a ni. Kan inhmachhawn ṭhin a, kan elpui ni mah se ka ngaisang a ni. A thawhrimna leh chak duhna hi entawn tlak a ni," tiin Ronaldo chu Messi aiin dah hniam zawk mah se ngaihsanna lai a neih thu a sawi.