Sterling-a chungah Gerrard a lawm lo

Raheem Sterling-a boruakin ziaawm lam a pan hleithei lo a, Liverpool captain hlui Steven Gerrard pawh a ṭawngchhuak ve leh ta.

LA Galaxy midfielder Gerrard chuan Sterling a khawsazia chu zah­puiawm a tih thu leh Jordan Henderson nena khaikhin phei chuan an khawsazia chu inthlau hlea a hriat thu a sawi.

England international Sterling hian tun hnaiah Anfield chhuahsan a duh vangin mawi lo tak takin a che zauh zauh a, Liverpool-in Bangkok, Malaysia leh Australia-a tour an neih turah tel loh a dil hnuin Nilaini leh Ningani khan damloh chhuanlamin club training a zawm tawh lo bawk a ni.

Liverpool tana vawi 710 lai lo inlan tawh Gerrard chuan, "Jordan chuan club tana a rinawmna a contract thar hmangin a lantir a, hlawhtlinna chang zel tur pawn ka duhsak takzet a ni. Raheem leh Jordan hi khaikhin a ralah chuan an in puitlin hleih hle a, Jordan hi chu professional taka che ṭhin mi, player ropui tak ni tura theihna nei a ni," a ti.

Henderson hi nimin khan Liverpool cap­tain thar atan puan a ni.

Team a kaihhruai thiam em vanga Captain Fantastic tia an koh ṭhin Gerrard chuan, "Ka ngaihdan chuan Jordan aia min thlak tur ṭha zawk hi ka hre lo. A game khelh dan ka en hian kan in anna tam tak ka hmu a, a inngaitlawm em em bawk," tiin Liverpool captain thar Hendo a fak.