MotoGP German-ah Marquez tak tak kan hmu leh ang ngem?

Pathianni hian MotoGP Ger­man Grand Prix chu Sach­senring tlankawngah an tlan leh dawn a, intlansiak hnuhung ber Dutch Grand Prix-a pahnihna dinhmun hauhtu Marc Marquez chuan intlansiak tura a inpeih tawh thu a sawi.

Yamah rider pahnih kum 36-a upa Valentina Rossi leh Jorge Lorenzo te hi inel leh ber tura ngaih an ni a, anni pahnih bakah Marquez pawh hi mipui ngaihven leh hmuh chak a ni ang. Lorenzo hian a zawna intlansiak vawi li hnehna a chan hnuah Assen-ah beisei a phak lo a, naktukah hi chuan hnehna chan a tumruh hle ang.

World champion nilai Marquez hian nikum MotoGP-ah khan bul ṭan fuhin tuma el phak a ni lo. Intlansiak hmasa sawmah hnehna a chang fai vek. Amaherawhchu kuminah chuan beisei angin a che ṭha lem lo thung. American Grand Prix-ah pakhatna niin hei bak chu tun season-ah hnehna a la chang lo.

Mahse, Netherlands-ah bei­sei na rawn nei tharin Valentino Rossi hnungah thlengin pahnihna a ni a, a chet ṭhatna hi German-ah pawh chhawm nun a beisei hle. Tun dinhmunah Marquez hian point 89 hmu mekin hmahruaitu Rossi chu point 74 zetin a phak lo mek. A lal lukhum humhim tur chuan intlansiak hmabak 10 an la neihah hian a chet ṭhat viau a ngaih bakah Rossi leh a teammate Jorge Lorenzo te an chetsual fe a ngai tawh ang.

Kum 22-a upa Honda rider Marquez chuan, "Argentina-ah leh Netherlands-ah khan pakhatna ka ni ngei dawna a lan laiin ka vanduai vangin hnehna ka chang lo. Tun season-ah beisei angin ka tlan ṭha tawk lo a, mahse beisei bo tawp chu ka la ni bik lo. German-ah hian hnehna ka chang a nih chuan mipuiin ka chungah rinna pawh an nghat leh thei ngeiin ka ring. Yamaha rider pahnih Rossi leh Lorenzo te che ṭha viau mah se kawng thui tak zawh tur kan la neih avangin engpawh ala thleng thei," tiin a sawi.

Inthlahdah thei an la nih loh thu sawiin rider championship-a hmahruai mektu Italian rider Rossi chuan, "Tunah hian thil engkim sawifel hun leh teh hun ala ni lo. Kan hmaah intlansiak vawi 10 lai ala awm avangin tu tan pawh kawng ala awm vek. A bik takin Marc hi a chet ṭhat ni a nih chuan dan ngaihna awm lo khawpa ṭha a nih avangin kan ngaihthah thiang lo ang," tiin a ṭawng fimkhur hle.