Bilic-a'n West Ham chak pui nghal

West Ham manager thar Slaven Bilic chuan a vawi khat nan Ningaini zan khan a team a enkawl ṭan a, Europa League first round qualifying second leg-ah Elliot Lee goal khat thun hmangin sikhat faiin Lusitanos an hneh. Inkhel hmasa nena belhkhawmin West Ham hi 4-0 in an chak a ni.

West Ham hian an mahni khelmual Upton Park-ah goal thum faia hneh­na an chan tawh avang­in second leg khel tura Lusitanos khelmual Estadi Comunal pan hi an huphurh hran lo. Beisei ang erawhin thil a thleng lo, srtiker Diafra Sakho chu hnawhchhuah a nih avang­in an chak hram chauh a ni.

Senegal striker Sakho hi European match thum khel thei lo tura hrem a ni a, an match leh pek July 19-ah Birkirkara an hmachhawn aṭangin a inlan thei lo ang.

Season thara Europa league khel turin Ham­mers hian qualifying first round an paltlang ta a, second round leh third round an paltlang leh thei a nih chuan playoff an khelh leh ala ngai cheu ang.

Premier League club Southampton leh 2013 Champions League finalist Borussia Dortmund te chuan third qualifying round an lut tawh.