Asamoah Gyan-a'n China a thleng
Ghana captain Asamoah Gyan chuan Chinese Super League club Shanghai SIPG zawm tura thutlukna a siam hnuin Nilaini khan China a thleng ta.
Kum 29-a upa striker hmuh chak hian Shanghai airport ah fans pungkhawm an ṭhahnem hle a, Nilaini vek hian Gyan hian medical paltlangin kum hnih cham turin China club-ah hian contract a ziak fel nghal a ni.
Sum ngah ngah hmelṭha
Premier League club Sunderland-ah pawh lo khel tawh Gyan hian Chinese club-ah hian a hlawh hnem dawn hle a, kar khata a hlawh zat tur ringawt hi £227,000 nia sawi a ni a, khawvel footballer zingah ani aia hlawh hnem hi mi pasarih chiah an awm dawn tihna a ni.
Kum 2011-a Sunderland
aṭanga UAE club Al Ain zawmtu Gyan hian China a pan hma hian UAE Pro League champion team-ah hian kar khatah £160,000 zet a lo hlawh tawh.
Mangṭha 'Al Ain'
Kum 2010-a BBC African Footballer of the Year lawmman dawngtu chuan a club hlui Al Ain chungah lawmthu sawiin, "Al Ain chhungkua leh fan-te chungah hun hlimawm leh nuam tak min hman tir avangin lawmthu ka sawi a ni," tiin a club hlui chu lawmthu sawina nen a thlah.
Gyan chuan sawi chhunzawmin, "Al Ain-ah hlawhtling takin hun kan hmang ho a, he club hi ka thinlung chhungril berah hian a awm reng tawh ang. Tunah chuan chona thar hmachhawn tura ka inbuatsaih a hun tawh a, Al Ain-a ka hlawhtlinna ang bawk kha Shanghai-ah pawh chan theih ka inbeisei," a ti.
Beiseina nen
Asamoah Gyan hi Al Ain-a hun a hman chhungin a hlawhtling hle. UAE club tan hian vawi 83 inlanah goal 95 zet khungin UAE Pro League-ah vawi thum a champion pui a, season thum chhung chu UAE league-a goal khung hnem ber a ni bawk.
Kum 2014 khan AFC Champions League-ah top scorer a ni a, AFC Foreign Player of the year-ah thlan a ni bawk. A record chhuanawm tak hi China lamah a chhawm theih beiseiin Shanghai SIPG-in pawisa tam tak sen huamin an la lut a, Gyan-a hmabak hi a ko hle.
England coach hlui Sven-Goran Eriksson enkawlna hnuaia khel mek Shanghai SIPG hi Chinese Super League table-ah pahnihna an ni mek a, an chung chiaha awm Beijing Guoan an phak lohna hi point khat chiah niin an club chanchina a vawi khat nan champion ngei an tum ruh hle.
Gyan thlaktu tur Emenike
Al Ain chuan an striker chhuanvawr chhuak ta Gyan aiawh turin Nigeria striker Emmanuel Emenike lakluh an tum.
Fenerbahce striker hian Ningani khan UAE a thleng a, Turkish club aṭang hian loan-in Al Ain hi a zawm dawn nia sawi a ni.
Ngaihven hlawh China
Tunhma in football khawvel-ah China-in ngaihven a hlawh ngai lo. Mahse, kum 2012-a Chelsea striker hlui Nicolas Anelka leh Didier Drogba te'n Chinese Super League club Shanghai Shenhua an pan hnuin ngaihven a hlawh ṭan a, tunah chuan khawvel huapa coach lar leh player hriat hlawh tak tak an kat ta nuk mai.
Shanghai Shenhua-ah hian French club Sochaux leh Bordeaux coach hlui pawh lo ni tawh Francis Gillot chu an coach a ni mek. Chinese Super League hmahruaitu ni mek Beijing Guoan F.C. coach hi Spanish club lar tak tak Atletico Madrid leh Sevilla te pawh lo enkawl tawhtu Gregorio Manzano a ni.
Brazil coach hlui Luiz Felipe Scolari chu Chinese Super League club Guangzhou Evergrande-ah coach a ni a, he club-ah hian Tottenham midfielder hlui Paulinho a khel bawk.
Shandong Luneng-a an striker rinrawl chu Brazil tan pawha khel phak Diego Tardelli a ni.
Mihring tamna China-ah hian sum a tam avangin khawvel huap coach lar tak tak leh player te'n an bawh mek zel a, khawvela league ngaihven pawl a ni chho dawn chauh niin a lang.