Mexico an chak chiang

A zawna match sarih ngawt chak ni hmel an hmuh loh hnuah Mexico chuan Ningani zan khan CONCACAF Gold Cup Group C inkhelah Cuba chu si ruk faiin an sawp.

Mexico hi manager Miguel Herrera enkawlna hnuaiah May thla aṭang khan chak ni hmel an la hmu lo a, he an record duhawm lo tak thai reh tur hian striker Oribe Peralta chuan hat-trick siamin an ram a chakpui chiang hle. Giovani dos Santos, Carlos Vela leh Captain Andres Guardado te chuan goal klhat ṭheuh an khung bawk.

Chicago-a Soldier Field-ah hian Cuba hi an manager Raul Gonzalez bakah player dang pasarih ngawt ten Visa an neih theih loh vangin an inlan thei lo. Assistant coach Walter Benitez hnuaiah squad-ah player 16 chauh awmin tournament an hmachhawn ve a ni.

Cuba football thu­neitute chuan Pathiannia Trinidad & Tobago an hmachhawn leh hunah chuan heng Visa nei lo te hian US an luh theih ngei an beisei thu an sawi.

Group C inkhel dang­ah Trinidad and Tobago chuan an group match hmasa berah Guatemala chu 3-1 in an hneh bawk.

Trinidad tan hian Striker Cordell Cato, defender Sheldon Bateau leh Joevin Jones te chuan ram tana an goal khatna ṭheuh khungin an ram an chakpui a ni. Guatemala tan Carlos Ruiz chuan goal khat khung ve mah se awmzia a nei lo.

Hnehna changtu Me­xico leh Trinidad te hian point thum ve ve hmuin knockout round an in pet tling nghal a ni.