Wimbledon Serena a hrâng zel; Muguruza pawh chak

Ningani zan khan World number 1 Serena Williams chuan a zawna a vawi 17 nan Maria Sharapova chu Wimbledon semifinal-ah straight set-in 6-2, 6-4 in a hneh. A vawi 25 nana Grand Slam final lut turin Williams hian minute 79 chiah hun a hmang a ni.

Semifinal lehlamah Garbine Muguruza chuan Agnieszka Radwanska chu 6-2, 3-6, 6-3 a hnehin final a lut ve bawk. Inrinni zan dar 6:30 hian Williams leh Muguruza te hi champion nomawi inchuhin an inhmachhawn leh ang.

Centre Court a inkhelah hian Russian star Sharapova hian Williams laka a record chhe tak thai reh tumin bei mah se a hlawh tling lo. Kum 2004 Wimbledon final hnua an intawn lehah Sharapova hi ala chak lo vek, hetih hunlai hian kum 17-a upa chauh a la ni.

American super star Williams hian Sharapova service hmasa ber a chhuhsak bakah game nganaah laksak lehin 6-2 in awlsam takin set a la nghal. Set hninaah pawh hun pawimawhah che fuh lehin game nganaah Maria service a chhuhsak leh a; 6-4 a set la zuiin hnehna a chang.

Kum 33-a upa Williams chuan, "Kan inkhelh hma kha chuan ka zam ve duh, a level a san tawh avangin boruak hi a danglam riau ṭhin. Mahse kan inkhelh hnu kha chuan nuam ti takin ka khel thei thung. Grand Slam final vawi 24 khel tawh mah ila khang kha ka chhawr ngawt thei bik lo. Chuvangin final-ah hian chak zawk tur sawi theih a ni lo a, fimkhur takin ka khelh a ngai ang," tiin a sawi.

Spanish kum 21-a upa Muguruza hian a khingpui Radwanska lakah minute 35 chhung lekin set khatna hloh mah se, set hnihnaah erawh a sercive hlohin set a hloh zui bawk. Mahse, set hnuhnung berah erawh a chesual nawn tawh lo.

Kum 1994-a Conchita Martinez a champion hnuah Spain mi Wimbledon champion an la awm leh lo. Kum 21 hnuah Muguruza hian an ram a chawimawi leh thei ang em tih chu kan hmu thuai dawn e.

Seeded 20-na Muguruza chuan, "Ka lawmna hi thuin a sawifiah zo lo ang. Tun hun thleng tur hian ka thawkrim em em a, ka thawhrimna rah a ni. Tunah hia a tawp ka la thleng lo a, ṭan mar ngaih lai tak chu tun hun hi a ni ang. Final-a ka khingpui tur hi a sulhnu en chuan ka tan hneh chi a ni lo hial ang. Amaherawhchu sulhnu thar siam turin ka inring tawk ve hle, hneh ngei tumin ka hmachhawn dawn," tiin a zam bik lo hle.