Emery-a'n Benitez a ringtawk

Europa League champion Sevilla boss Unai Emery chuan Real Madrid coach thar Rafa Benitez chu Santiago Bernabeu-ah a hlawhtlin ngei a beisei thu a sawi.

Real Madrid hian season hman zawh takah khan eng trophy mah chawi loin an hun an hmang a, an manager ṭanglai Carlo Ancelotti chuan a hna a chan phah. Italian boss thlak tur hian Real Madrid B team-a a coaching career ṭantu Benitez an la lut a ni.

Emery chuan Benitez hi a ringtawk khawp a, "Ka ngaihdan chuan Real Madrid-in Benitez an la lut hi an tifuh takzet a, kum tam tak chhung hna ropui tak a lo thawh tawh kha an hmuh hmaih lo a ni," tiin Benitez chu a hnathawh ropui tak avanga Real Madrid manager ni thei a nih thu a sawi.

Serie A club Napoli leh AC Milan-in coach tura an sawmna hnartu Emery chuan, "Real Madrid hi season tharah chuan La Liga chawi tura beiseiawm ber an ni leh tawh a, a chhan chu coach atan Benitez an neih vang a ni. Real Madrid an champion loh chuan Barcelona an champion tihna a ni mai a, khawvela team ṭha ber ve ve an ni. Barca leh Madrid hi khawvela team ṭha ber an ni a, mi hlawhtling tawh ropui takin an belhchhah leh ngat phei chuan chak tur hian an dinhmun hi a ṭha bik em em mai a ni, " a ti.

Emery chuan Napoli sawmna a pawm loh chhan sawilang nghalin, "Zep lohah chuan team dangin min sawm ngei a, mahse Sevilla pawh hi kan la ṭhang thei zel tih ka hriat avangin he hmuna cham zel hi ka duh a ni. Napoli-in min sawm khan hmasawn an duh zia ka hria a, an ruahmanna te kha sawisel tur ka hre lo. Mahse, tunah chuan Napoli enkawl aiin Sevilla enkawl ka chak rih zawk a, ka hmalam hunah te chuan ka la enkawl mahna. Sevilla-ah chuan Champions League ka khel dawn a, Napoli-ah chuan ka khel thei dawn lo a ni," tiin Champions League khelh chu Sevilla-a a cham chhan a nih thu a sawi.

Europa League-a a zawna Sevilla champion puitu Emery chuan Milan-in kum hnih lai an rim tawh thu a sawi bawk.