Schweinsteiger-a'n England lam a hawi

Bayern Munich chairman Karl-Heinz Rummenigge chuan an midfielder Bastian Schweinsteiger chu England-a club ṭhenkhatin an duh tih a hriatin a hlim takzet thu a sawi.

Allianz Arena-a season khat dang contract la nei lai Schweinsteiger hi Man­chester United nen sawizawm mek an ni.

Rummenigge chuan, "Chawlh a hman lai khan phone-in Bastian hi ka bia a, England-ah amah duhtu club an awm tih a hriatin a hlim hle a ni tih hi thil zep ṭul pawh niin ka hre lo. Club-a alo kir leh hunah a hranpa in inbiakna kan nei ang," tiin an midfielder pawimawh chuan England lam a hawi thu a sawi.

Schweinsteiger hi United boss Louis van Gaal-a'n Bayern Munich a enkawl laiin Dutch coach hnuaiah hian a lo khel tawh a, Old Trafford lam pan hi a hreh phah loh sawt tura ngaih a ni.

Germany international hian Bayern Munich-a a cham chhungin Bundesliga title pariat, Champions League nomawi pakhat leh domestic cup pasarih a lo chawi tawh a, 2014 World Champion Germany team-ah an player ṭangkai ber pawl a ni bawk.

Bayern boss Pep Guardiola chuan Schweinsteiger hi a hmalam hun chu ama kuta a innghah thu a lo sawi tawh a ni.