MPL4-ah club thar a awm dawn em ni? Samson, Ricky leh Tluanga te club khatah an khel dawn

Mizoram Premier League season 4 khel tur club pariat a chiang tawh a, club thar dang tan hmun a awm tawh lo. Amah­erawhchu player an lak dan aṭanga thlirin MPL3 pasarihna nih vanga relegation playoff khel Reitlang FC hi club thara chhal theih an ni a, club hming an thlak dawn tih thuthang a awm bawk.

Reitlang hian I League thlenga captain ni phak Samson Ramengmawia bakah MPL-a tawn­hriat ngah Lalrinzuala Khiangte, Vanlalchhanhima Sailo, Malsawma Chhangte, Ricky Lal­lawmawma, Lalnuntluanga, C. Zothansanga (Valtea) leh Van­lalruata te an la lut chiang tawh.

Hruaitu ṭha an lut

2011 I Day Football-ah Shillong Lajong-in final-ah Royal Wahingdoh 4-0 in an sawp a, he mi ṭuma Lajong captain chu Samson-a a ni a, an coach chu tuna Bangaluru assistant coach Pradyum Reddy a ni.

Pradyum chuan, "Samson-a hi team kaihruaitu ṭha a ni. Lajong-ah Mizo player an tam a, Mizo leh hnam dang inkara palai ṭha tak a ni a, field pawn leh chhungah team kaihruaitu a ni," tiin Vanglaini palai a hrilh.

Samson hian Reitlang FC coach hna a chelh ang a, inkhelh erawh a la chawlhsan dawn lo.

Samson chuan, "MPL4 chu a phurawm tawh khawp mai, champion chu vanneih leh vanneih loh a ni ber. Amaherawhchu champion tum ngam turin kan ṭha tawk chuan ka hria, player pawh kan la lak belh ka beisei," tiin player an neih ṭhat thu a sawi.

Shillong Lajong player hlui hi Imphal, Manipur-ah AFC 'C' Certificate Course a zir mek. Ramhlun South midfielder Samson-a chuan, "Coach ka ni dawn a, player ka ni tel bawk. Coaching course ka kal avangin ka inkhel tawh dawn lo tihna a ni lo. Hun rei tak ka la inkhel thei ang," tiin a sawi.

Chanmari FC aṭanga an lak Ricky hi team kaihruaitu ṭha a ni. Defence leh midfield-a khel thei Ricky hi Aizawl FC leh Chanmari FC tana captain ni thei a ni.

Ṭhatpui tham player

Dinthar tlarhnung tiphuitu Rinzuala leh Chhanhima-te hi Mizoram aiawha khel pha an ni a, chu chuan an theihna a pholang chiang hle. Malsawma Chhangte hi MPL1-a Aizawl FC defender pawimawh kha niin MPL2-ah inhliam vangin an inlan tam lo. Reitlang hian Bethlehem VT aṭangin an player hlui Teruata an la let bawk.

Midfield laiah Ricky leh Sam­son-a te an awm thei a, Dinthar leh Aizawl FC tana khel tawh Tluanga an la lut a, squad tichak turin Republic Veng rawlthar Rosangpuia an ziak thar bawk. Winger-ah FC Kulikawn leh Aizawl FC chakna hnar ni ṭhin Valtea an nei bawk.

Tunah hian Reitlang training-naah FC Lalawmpuia (Tuaitea) a inlan ṭhin a, Tuaitea hian 'comeback' a tum niin a lang a, contract an la tifel chiah lo a; a inhliam a dam fel a, a fitness a siam ṭhat chuan MPL4-ah kan hmu mai thei?

He club hian player ṭha bik an la zawng zel a, an la duhtawk mai lo.