Bengaluru ngamtu East Bengal an kal zel

Inrinni zan Indian Super League inkhelah East Bengal chuan 1-0 in Bengaluru FC an hneh a, Kolkata club-in tun season ISL-ah a vawi hnih nan hnehna an chang ve leh ta - team 11 inelnaah pakuana an ni chho ve ta. 

Bengaluru hian tun season-ah beisei an phak loh avangin ISL nomawi lo chawipui tawhtu coach Carles Cuadrat chu a hna aṭangin an chawlhtir a, assistant coach Naushad Moosa chuan club enkawl hna a thawk zui lailawk.

Mahse, India international hlui enkawlna hnuaiah Bangalore club-in eng ruai an ang lo a, minute 20-na lekah goal an chhuah nghal - Matti Steinmann chuan Kolkata club tan nalh zetin goal hi a khung a, 1-0 a chak nan an hmang zui ta a ni. 

Hetihlai hian Bengaluru hi khel chhia tia sawi tur erawh an ni lo - East Bengal tan goalkeeper Debjit Majumder a che ṭha takzet a, Bengaluru captain  Sunil Chhetri-a khung tur nia lang chu vawi hnih ngawt chu ṭha zetin a dang. Erik Paartalu, Cleiton Silva leh Deshorn Brown ten Bengaluru tana an hun ṭha neih an chhawr thei lo bawk. 

East Bengal tana Bright Enobakhare-a shot chu Bengaluru keeper Gurpreet Singh Sandhu-a'n ṭha zetin a dansak a, a tawpah erawh Bengaluru an tlawm ta tho. 

Zirtawpni zan ISL inkhelah Hyderabad chuan 4-2 in NorthEast United an hneh a, pathumnaah Hyderabad an invawrh chhoh laiin Highlander erawh playoff khel turin an dinhmun a chhe sawt hle.

Hyderabad hian Aridane Santana leh Joel Chianese hmangin minute 36 chhung lekin goal hnih an khung hman a, mahse, NorthEast United-in Federico Gallego (penalty) leh Benjamin Lambot goal hmangin first half chhungin an chhanglet hman. 

Highlander-in an si phurh goal hnih ngawt an sut theih avangin beiseina an nei thar a, mahse, minute 64-naa luhtir Liston Colaco chuan engkim a rawn thlak danglam.

Goan rawlthar ṭhangduang hian khelmuala minute 26 lek hun a hman chhungin goal hnih a rawn khung a, 4-2 in a team hi hnehna a chanpui. 

NorthEast United tan Lalrempuia Fanai chuan inkhel bul a ṭan a, Rempuia hi Lalengmawia (Apuia) chuan minute 67-naah a thlak - Rochharzela chu minute 68-naah luhtir a ni bawk a, result erawh an thlak danglam thei bik lo.