Schalke an chak ve ta

Bundesliga match 30 zet hnehna an chan zawh loh hnuin Schalke 04 chuan hnehna an chang ve ta a, an mikhual Hoffenheim chu 4-0 ngawtin an sawp. 

German top flight league-a chak lo rei ber record chelhtu chu Tasmania Berlin an ni - anni hian 1965-66 season khan league match 31 chhung a zawnin hnehna an chang zo lo tawh a, Schalke hian record duhawm lo nih rual theihna an neih chu an mangṭha ta a ni. 

January 17, 2020 hnua league match-a chak la nei lo Schalke tan Matthew Hoppe chuan hattrick a siam - kum 19 mi rawlthar hi American player zinga Bundesliga hattrick siam hmasa ber a ni. 

Hoppe hian Schalke reserve team tan a hun tam zawk a hmang a, German fourth division lamah a khel - Hoffenheim-a hmachhawnna inkhel hi senior team tana a match ruk khelhna chauh a ni a, goal thum a khung zui ta a ni. 

Schalke tan hian midfielder Amine Harit chuan goal khat a thawh ve bawk a, Hoppe-a goal thum khung hi a siamsak vek a ni bawk!

Bundesliga match 15 an khelh tawh aṭanga point sarih nei mek Schalke hian tun season-ah coach pali an nei tawh -  David Wagner leh Manuel Baum an ban a,  Huub Stevens chuan coach lailawk hna a chelh hman bawk. 

December 27 khan Christian Gross an lalut a, Swiss manager Gross kaihhruaina hnuaia an match hnihnaah hnehna an chang ve ta a ni - Bundesliga inhamtan chu an thupui tur a nih chhunzawm ang. 

Sawi hmaih thiang lo pakhat a awm a, chu chu Sead Kolasinac a ni - German left back hian captain nih tir an tiam avangin Schalke hi season tawp thleng atan loan-in a zawm a, an tiam lawk ang ngeiin a club thar tana a match hmasa berah captain armband a rawn hreng a, hnehna a chanpui bawk. 

Arsenal-a Kolasinac ang thoa tla tlum lo, Fenerbahce nena inrem tawh anga an sawi Mesut Ozil chuan, "Unaupa ka va lawmpui che em! Ṭhian duhtak te u, hei ngei hi a ni, 'Kolasinac effect' chu," tiin a ṭhianpa lawmpuina thu hi twitter lamah a tarlang.