Tuin nge Liverpol dang thei ang?

Premier League champion Liverpool-in nomawi humhim an tum tih an pholan chhunzawm zel a, Inrinni zan khan Merseyside derby-ah Everton chu 2-1 in an hneh - league match nga an khelh tawhah an la chak vek!

Liverpool-in Everton laka goal khung turin hun an mamawh rei lo - Anfield-a lut tlai deuhte chuan an ṭhuthmun an rem fel hman vel awrh ang tih tur, minute ngana lekah Ryan Gravenberch a inlar a, Dutch midfielder hian Mohamed Salah-a siamsak chu goal-ah a chantir.

Reds-in an duhtawk mai lo. Minute 29-naah Hugo Ekitike a inlar a, French striker hian Alexander Isak awm tawh mah se, inkhel bul ṭan zel a phu tih pholangin, an goal hnihna a khung - goal hmahruai khungtu Gravenberch-a siamsak a ni.

Pound maktaduai 70 man Ekitike hian Reds a pan hnuah match sarih khel tawhin, goal li a khung tling ta der a, assist vawi khat a nei bawk.

Liverpool-in minute 30 hmain goal hnih an khung hman a, mahse, ṭum dang ang thoin a tirah ri nghal vut mah se, goal khung chhunzawm an harsat a, Everton-in hma an sawn hret hret thung.

Minute 58-naah ṭhenawm club hian si phurh an sut ṭhen ta nge nge a, Everton tana khel ṭha tak Jack Grealish-a cross chu Iliman Ndiaye chuan Idrissa Gueye-a tana pet nuam tur tawk velin a chhawpsak a, Gueye-a shot hi a ṭhat em avangin Liverpool keeper Alisson tan dan theih a ni lo.

Liverpool fan-ten ṭum dang ang thoin, hun tawp lamah an talbuai leh dawn emaw an ti hman a, mahse, Anfield-ah Reds an ṭang tluan - an man belhkhawm ringawt pawh £241mtd hial kai phak, Alexander Isak leh Florian Wirtz te bench aṭanga an luh theih avangin, team pahnih an inṭhat hleih deuh hlek tih a lang bawk.

Reds manager Arne Slot chuan, "Tun hnaia kan match sarih zinga match thum chu hma takah khelh a ngai a, chung zawng zawng ngaihtuah chuan kan khelh danah ka lawm hle.

"Inkhelh hma hrim hrim hi ka sawisel hran lo. Mahse, Nilaini zana inkhelh a, Inrinni chhuna inkhelh lehnghal chu a harsa ve a ni. Mahse, chuti chung chuan first half-a kan khelh ṭhat em avangin derby-ah kan chak a, a lawmawm takzet," a ti.

Liverpool inkhelh hun kha keini sanaah tlai lam dar 5:00 niin, UK lamah chuan chhun dar 12:30 a ni thung - Reds hian Thawhlehni zan dar 12:30-ah Southampton nen League Cup third round an khel zui ang.