Inrintawkna hloh 'Chanmari' Vs Team huaisen 'Police'

GIG Motors MPL12-ah vawiin tlai dar 3:00 hian Chanmari FC an inlan lehnghal dawn a, Dinthar FC chelhtu Mizoram Police an hmachhawn dawn. MLS an hneh loh avangin coach Rochhingpuia'n pressure a nei ṭan a, Police erawh an khel buai lutuk a reh a, I League club lakah point hmuh an inbeisei leh thei ang.

Police hian MPL match hmasa berah Aizawl FC 5-0 in an hneh a, match hnihnaah Chanmari FC hmachhawnin, I League club hian sawp an inbeisei. Mahse, ruahsur hnuaiah Police-in Chanmari an chelh a, 1-1 in an inhnehtawk. MPL10 champion hian an player neih ṭhatte an rawn hmang thiam chho leh ṭan a, 1st Bn MAP Academy hmanga squad thuam chakin an khelh dan thlirin, hma an sawn tih a lang. Chanmari an hmachhawn ṭumah hian training nei mek an player ṭhenkhat an lakchhuah theih chuan an ṭha lehzual ang.

Chanmariin Aron Vanlalrinchhana an chhawr leh thei tawh dawn a, mah se Cherhlun tlangval ringawt hian danglamna a thlen thei bik lo. I Day Football champion team hian a hmawr bawk dan an zir ṭhat leh a ṭul a, tun aiin tlarhnung a phui ṭhat a ṭul bawk. Chhinga'n insiamṭha turin ni hnih hun a nei a, a hun neih a chhawr ṭangkai dan Police lakah a hriat theih ang.

Police-in ṭantu an neih ṭhat kher a rinawm lo a, mah se Police hotu lam aṭangin ṭawiawmna an dawn ṭhat a rinawm. Chanmari an harh thar chho leh ṭan a, chutihrualin MLS an hneh loh ṭumin khelmual pawnah Aizawl khaw pawn club an elpha lo hret zawk. Khelmual chhung chauh ni loin khelmual pawn lamah pawh Chanmarians-in insiamṭhat an la mamawh hle.