Lawngtlai club-in I League club an hneh

GIG Motors MPL12-ah MLS FC-in Lawngtlai mipui tan lawmna an thlentir a, Zirtawpni zan khan I League club Chanmari FC 1-0 in an hneh. RG Stadium zan inkhelah hian Freddy Lalrinkima'n injury time-ah goal awm chhun a khung a, chenna ngai lo ramah Lawngtlai club ṭantute a chentir a, MLS ṭantu an pung sawt dawn.

Round 8 zan inkhelah meuh chuan Chanmari leh MLS pawhin ṭantu an nei tawh a, Chanmarians erawhin MLS an hmachhawn zanah lawmna tur an hmu lo. Rochhingpuia leh a hoten thlawpna ṭha an mamawh tih an hmu ang a, chutihrualin Aron Vanlalrinchhana tel lohna Chanmari FC an naran lutuk erawh hmuh hrehawm an tingei ang.

I League club hi tlarhmaah an hriam lo a, first half-ah Joel Lalramengmawia tauh over erawh chance ṭha bik a ni. Chutihrualin MLS tan Ricky H. Vanlalhriatsanga leh Ngurthanmawia ten an hun ṭha neih goal zawnah an pet lo ve ve.

Injury time-ah MLS tan Kanan an hneh ṭuma goal hnih khungtu Freddy a rawn lang a, injury time-ah Lalremmuana ball vawrh luh chu MLS forward Freddy hian goal-ah a chantir a, Chanmari keeper Zothanmawia chhuah sual vang ni bawk mah se MLS forward finishing a ṭha hrim hrim. September 23, Thawhlehni zanah MLS leh Saikhamakawn an inkhel ang a, Vanlalpeka hote tan semifinal beiseina a nun leh tak avangin Aizawla Lawngtlai mipui awmten MLS hi an ṭawiawm ṭha khawp ang.