Arsenal chakna rawlthar duhawm Smith Rowe

Emile Smith Rowe leh Pierre-Emerick Aubameyang ten extra time-ah goal khungin Arsenal an chakpui a, an mikhual Newcastle United 2-0 a hnehin FA Cup third round an paltlang.

Zirtawpni leh Inrinni zan inkhelah club lian leh langsar zingah tlawm an awm lo. Premier League club Arsenal, Manchester United, Liverpool leh Everton te an chak laiin, table mawng lama talbuai West Brom erawh League One club Blackpool FC lakah an chak lo.

Sam Allardyce enkawl Hawthorns leh Blackpool hi hun pangngaiah 2-2 in an inhnehtawk a, penalty shootout neih niin Blackpool lamain 3-2 in hnehna an chang.

FA Cup champion lai Arsenal tan Emirates Stadium a Newcastle lo mikhual hi thil huphurhawm a ni hran lo. Manager Mikel Arteta-a'n player a siksawi nasa a, chak tur erawh chuan vanneihna an mamawh tel.

Hun pangngaiah team pahnihin goal khung theihna remchang an neih an hlah hnem. A bik takin Andy Carroll-a'n hnai tak aṭanga vawi hnih a hlah chu a vanneih ṭum ni se khung ngei tur a ni, keeper Bernd Leno-a'n a lo dansak bakah goal zawnah a pet lo.

English striker Carroll khan hun pangngai tawp dawna 'chance' ṭha bik a hmuh kha khung ni se la chuan, kum 25 chhunga a vawi hnih nan Arsenal chu FA Cup third round aṭanga pet chhuah an ni ang, mahse North London club an vannei hlauh.

Goal an neih mai theih loh avangin Arteta-a'n danglamna thlen turin player a thluak kual. Bench aṭangin rawlthar Smith Rowe, Bukayo Saka, Granit Xhaka leh striker Alexandre Lacazette te dahluh an ni.

Tun hnaia khel ṭha tak Smith Rowe chu hun pangngai an khelh laiin red card pek a ni a, mahse thil thleng chu VAR hmanga endik a nih hnuah an hlihsak. English rawlthar hian minute 109-naa Lacazette ball tauh chu a awma lo dawngin keeper Martin Dubravka dan phak lohin a hlap lut.

Arsenal boruak a fuh chhunzawm a, defender Kieran Tierney cross chu striker awmna tur hmun taka lo awm Aubameyang-a'n harsa lo taka khungin an chak a nemnghet. Gabon international hian league lamah pawh goal khung zui a inbeisei ang.

Gunners manager Arteta chuan, "Emile Smith Rowe khan a khel hmuhnawmin team tan a ṭangkai takzet. Hun ṭhenkhatah kha chuan vanneihna zawngin a risk ve bawk a, khatianga kawng dap chawp a ngaih chang kha a awm ve bawk.

"FA Cup kan ngai pawimawh a, theihtawp kan chhuah chhunzawm ang. Eng inelna pawh ni se la hnehna chan hi a pawimawh, kan chak a nih chuan team-ah a ṭha zawngin nghawng a nei ṭhin," a ti. Tun hnai an match hnuhnung paliah an chak vek a, goal khat chauh an chhuah.

Newcastle manager Steve Bruce chuan, "Hun ṭha kan nei a, a bik takin hun pangngai tawp dawnah inkhel tih tawp theihna remchang lutuk kan nei, mahse kan chhawr ṭangkai thei si lo. Andy Carroll kha dem tur a ni lo, hna ṭha takin a thawk tih kan hmu," a ti.