Chawlh zai rel lo Kane leh Bayern

Harry Kane chuan tun season hman mekah a vawi hnih nan hattrick a siam leh der tawh! England captain Kane-a goal thum khung hmangin Bayern Munich chuan Hoffenheim chu 4-1 in an hneh.

PreZero Arena-a inkhelah, mikhual Bayern Munich an tlangnel hle - striker ṭha Kane hian chawlhlawk hma hretin goal a khung ṭan a, second half-ah goal hnih dang khung belhin a team a chakpui.

Hoffenheim lamin West Ham player hlui Vladimir Coufal hmangin goal khat sut ve mah se, hun tawp dawnah Serge Gnabry chuan Bavarians chak nemnghehna a khung a, forward thar Luis Diaz chuan goal khung lo mah se a hmuhnawm lehpek hle.

Champions League-a Chelsea an hmachhawn ṭumin Kane-a'n goal hnih a khung a, tunah goal thum a khung zui leh ta, a hna a tlin ṭhin hle. Kane chuan, "Hat-trick Harry tiin ka naupan lai chuan min ko ṭhin.

"Box chhungah a nih tawh chuan, penalty a ni emaw ni lo emaw pawh ni se target zawna pet ngei ka tum ṭhin," a ti a, a team hmasa Tottenham Hotspur bakah an ram England tan pawh goal thun khawl a ni tel reng bawk a ni.

Bayern Munich tan hian Nicolas Jackson pawhin a match hmasa ber a khel - Chelsea aṭanga loan hmanga an hawh hian duhthusamin a khel nghal mai bik lo, minute 62-naah thlak a ni.

Vincent Kompany enkawl Bayern Munich hian tun season Bundesliga match li an khelh tawh chinah hnehna an chang vek - German football inelna sang berah hian chak kim thei awmchhun an ni a, season tir chauh la ni mah se an champion leh ngei a rinawm.