Juventus an chak zo lo

Serie A season thar an match hmasa pathumah Juventus an chak vek a, an record duhawm tak hi an kaltlangpui thei ta rih lo - Old Lady hi Hellas Verona nen 1-1 in an inhnehtawk.

Inrinni zan khan Marcantonio Bentegodi Stadium-ah Juventus hi an lenglut a, a tir lamah mikhual tan Francisco Conceicao chuan goal a khung hmasa, chawlhlawk hma chiahin Verona tan Gift Orban chuan penalty aṭangin a sut a, goal dang a lut zui tawh lo.

Juventus manager Igor Tudor chuan, "Ka naute inkhel kha chik taka en chuan an chau tih a hriat a, ni danga tha za leh tha tho taka an che vel ang kha a ni lo. Hellas Verona khan an khel ṭha ve bawk a, point kan insem kha thil nihna tur awm tak pawh a ni," tiin a sawi.

Turin club hian kar laihawlah Borussia Dortmund nen Champions League an khel a, kartawpah an inlan zui nghal avangin an chau tih a hriat, league match vawi li an khelh tawh aṭanga point 10 hmuin a chung berah an awm - champion lai Napoli (9 points) aiin match khatin an khel tam thung.

Inrinni zan Serie A inkhel dangah AC Milan erawh an chak chiang a, an mikhualna ramah Udinese chu 3-0 a sawpin, point thum hlu tak an hlawh chhuak a, table-ah pathumna dinhmun an luah nghal bawk.

Milan tan hian Christian Pulisic chuan goal hnih a khung a, Chelsea forward hlui bakah hian Youssouf Fofana chuan goal khat a khung a, mikhual lamin chhanletna tur an nei lo.