NBA record thar siamtu Ball

LaMelo Ball chu NBA a triple-double nei thei naupang ber a ni a, a team Charlotte Hornets chu Atlanta Hawks lakah 113-105 in hnehna a chanpui.

Kum 16 leh ni 140 mi Ball hian point 22 bakah 12 rebounds leh 11 assists a nei. Tun hma lama record lo siam tawh Markelle Fultz (kum 19 leh ni 317) chu khumin record thar a rawn siam.

Hornets head coach James Borrego chuan, "Kum 19 mi chauh a la  ni a, a season hmasa berah hetianga rawn chet nghal hi kan beisei ngam lo. Record siam hi amah leh team tan a ropui hle," tiin a player a fak.

American rawlthar Ball hi Hornets player zingah, bench aṭanga luh hnua triple-double nei thei hmasa ber a ni - tun hnaiah a zawnin match thum hnehna an chang ta chiah bawk a ni.

Eastern Conference hmahruaitu Philadelphia 76ers chu Denver Nuggets lakah 115-103 in an tlawm a, anmahni mualah match 20 chhung chak loh nei loa an kaltluang lai chu an tih tawpsak.

Inkhel dangah Milwaukee Bucks chuan NBA most valuable player (MVP) vawi hnih ni thei Giannis Antetokounmpo chhawr thei lo mah se an chak tho, an khingpui Cleveland Cavaliers chu 100-90 in an hneh.

Sacramento Kings chu a zawna a vawi hnih nan an chak lo, 125-99 in Portland Trail Blazers lakah an tlawm. Phoenix Suns erawhin Indiana Pacers 125-117 in an hneh ve thung.