Messi & Griezmann an vul - Barca tan lawmna

Lionel Messi a khelh ṭhat phawt chuan Barcelona an khel ṭha ṭhin tih chu a tak ramin a lang leh ta -Inrinni zan khan league match inkhelah goal hnih a khung a, Granada chu 4-0 in an sawp. 

Barcelona tan Antoine Griezmann chuan goal hnih a khung bawk a, Catalan club hi table-ah pathumnaah awm chhoin champion an beisei ngam ve leh ta. 

Real Madrid erawhin hnehna an chang zo lo - an mikhualna ramah Osasuna chu 0-0 in an inhnehtawkpui a, table-ah pahnihna nih chhunzawm mah se Barca aia an sanna chu point thum chauh a ni.

Hetihlai hian La Liga hmahruaitu Atletico Madrid chu Inrinni zana inlan tura tih ni mah se vur a tlak nasat avangin Athletic Bilbao nena an inkhel tur chu sawn a ngai. 

Barcelona-in Granada khelmualah goal khung turin hun an mamawh rei lo - minute 12-na lekah Griezmann chuan ṭha zetin a khung a, a tirah offside vanga pawm ni lo zet mah se referee-in a thutlukna sutin goal-ah a pawmsak. 

Minute 35-na a ni a, Messi hun a her chhuak - Argentine forward hian Griezmann-a siamsak chu an goal hnihna turin a khung a, goal mawi bik a ni. 

Kum 33 mi forward hian a la duhtawk lo cheu. Minute 42-naah freekick hmangin a khung leh - he goal hi goal mawi leh danglam bik a ni. Granada keeper Rui Silva dinna lamah lei hrulin a pet a, Bilbao right back Carlos Neva chu an wall siamah mu hial mah se Messi an dang zo chuang lo. 

Messi hian tun season La Liga match 17-a khelh aṭangin goal 11 a khung tling ta a, assist vawi li a nei bawk - a season duhawm lo anga an sawi season-ah league top scorer a ni mek! Inelna hrang hrangah match 21 khelin goal 14-a khung a, assist vawi ruk a nei bawk. 

Barcelona a pan hnuah Griezmann-a'n sawiselna a tawk nasa a, mahse, a class erawh a la ngai reng tih Granada lakah pholangin goal hnih a khung - a goal pahnih hi 'striker goal' tia kan sawi ṭhin kha a ni a, class huang chhunga dah ve ve ngam a ni. 

French forward Griezmann-a'n August 2019 hnua Spanish top flight match-a goal hnih a khung lehna hmasa ber a ni a, kum 29 mi forward hian tun season league match 17-ah goal nga khungin assist vawi li a nei tawh.

Granada-in si li ngawt an phurh hnuah red card avangin Jesus Vallejo chu minute 78-naah an chan zui a, hun a tawp hmain chak tur a chiang fel der tawh. 

Mualneitu Granada-in inkhel ṭantir lama an hun ṭha neih an chhawr loh chu an ui ang tih a chiang a, Roberto Soldado shot ṭha tak chu Barca keeper Marc-Andre ter Stegen-a'n a hming

chher nan a hmang - kha shot kha goal ngat se inkhel result a danglam mai thei. 

Barcelona chak thu hre sain Real Madrid-in Osasuna an lenchilh a, mahse goal an keng tel lo - khualmualah goal an khung loh avangin point khata an lungawi a ṭul a, league match riat chhung tlawm tawh lo Barca nen an inthlau ta lo hle. 

Spain-ah thlipui Storm Filomena a tleh avangin nunphung a khaihlak phah a, vur a tlak nasat avangin Osasuna leh Real inkhel hi sawn mai theih dinhmunah a ding reng.

Mahse, inkhel kaltlangpui a ni a, team pahnihin inkhelh an harsat - first half chhung zawnga team pahnihin target-a shot an neih zat belhkhawm chu pathum a ni!

Osasuna khelmuala inkhelah hian vur tla nasa lutuk avangin inkhelh hma leh chawlhlawk laiin khelmual tih fai a ngai a, Real tan Karim Benzema leh Sergio Ramos-ten goal khung ve ve mah se offside vangin pawm a ni lo. 

Atletico Madrid inkhel thei lo mah se La Liga table chung berah an awm chhunzawm a, anmahni hnaih bertu Real Madrid aiin point khatin an sang - match thumin an khel tlem thung. 

Wanda Metropolitano-ah Atletico Madrid hi Bilbao mikhual tur an ni a, mahse, Madrid khawpuia Barajas airport-ah 'Storm Filomena' vanga vur a tlak nasat avangin Bilbao player-te chuanna thlawtheihna a ṭum thei lo. 

Inkhel loin Bilbao player-te an kir a, he thu buatsaih thleng hian team pahnih inhmachhawn hun tur siamrem a la ni lo - Copa del Rey round of 32 inpetkai Bilbao-in Spanish Cup an thlen thui dan a zirin inkhelh hun hi siamrem theih a nih tur thu Spanish media-te chuan an tarlang. 

Atletico hi Nilaini zing dar 2:00-ah an inkhel zui dawn a, Inrinni zana 3-2 a Real Sociedad hnehtu Sevilla an mikhual ang - Sevilla tan hian Youssef En-Nesyri chuan hattrick a siam a, Sevilla defender Diego Carlos chuan an lamah ti lutin Alexander Isak chuan Sociedad tan hian a khung ve bawk.