Haaland a inlar leh ta

Norwegian striker Erling Braut Haaland chu hliam vangin December thla chhung a inlan thei lo a, kumina an match hmasa bera Borussia Dortmund-in Wolfsburg 2-0 a an hneh ṭumin goal a khung lo.

January 9, Inrinni zanah erawh goal khung thei bik Haaland bawk kha a rawn inlar a, Norwegian striker goal hnih hmangin Dortmund-in an elpui RB Leipzig 3-1 in an hneh.

Red Bull Arena Leipzig-a inkhelah first half-ah goal a lut lo. Second half-ah Dortmund-in English winger duhawm Jadon Sancho hmangin minute 55-naah hma an hruai a, chak nemngheh nan Haaland-a'n goal hnih a khung zui.

Minute 71-naah Haaland hian Sancho cross a tauh goal a, minute 84-naah Marco Reus-a pass fing tak chu Haaland-a'n lain keeper Peter Gulacsi a bum hnuah goal ruakah a khung.

Kum 20 mi Haaland hian Bundesliga match 10 aṭangin goal 12 a khung a, tun season inelna hrang hrang match 16 aṭangin goal 19 a khung. Borussia Dortmund hian hnehna an chan avangin point 28 an hmu a, palinaah an awm. 

Dortmund-in result chhiat vangin manager Lucien Favre an ban a, assistant manager Edin Terzic-a'n team enkawlin match nga aṭangin vawi li an chak.