Poch hoin PSG an chak

Mauricio Pochettino-a'n Paris St-Germain a enkawlna hmasa berah chak zo lo mah se a thawh hnihnaah an chak ta. French champion hian an mikhual Brest chu 3-0 a sawpin nomawi humhim an tum chhunzawm zel.

Inrinni zan Paris khawpuia inkhelah PSG tan Moise Kean, Argentina forward Mauro Icardi leh Spain midfielder Pablo Sarabia ten goal khat ṭheuh an khung. Goal thum an khung bakah an goal an venhim avangin coach Poch a lawm.

PSG-in an thiampuipa Neymar chu hliam vangin an la chhawr thei lo a, forward Kylian Mbappe-a'n goal khung lo mah se a hmuhnawm. France international hian an goal hmasa ber Kean khung tur a siamsak.

French champion PSG manager thar Pochettino chuan, "Mimala innghat kan ni lo a, chuvangin player hliam ṭhenkhat an rawn dam ta hi chanchin lawmawm a ni. Match khelh hmabak kan ngah, chumia hnehna chang zel tur chuan inkhel thei kan tam a ngai.

"Icardi a dam tawh a, ani bakah Julian Draxler pawhin ngai a awh chho leh tawh," tiin a player hliamte an dam ta chu lawmawm a tih thu a sawi. Hliam leh hrileng kai vanga chawl Angel di Maria pawh tun hnaiah a inkhel pangngai leh tawh.