Man United-ah Germany captain

Manchester United chuan Inrinni khan Germany captain Bastian Schweinsteiger chung­changah Bayern Munich nen inremna an neih tawh thu an puang. Hemi hma hian United leh German midfielder te hi hlawh chungchangah an inrem tawh a, medical examination chiah paltlang tur a awm tawh.

Bayern tana Bastian-a contract neih lai hi kum 2016-a tawp tur a ni a, Pep Guardiola hnuaia player pawimawh a nih phak loh avangin a contract neihlai pawhsei a tum lo, Bundesliga champion hian ui tak chungin chhuah an remti bawk.

Schweinsteiger man tur hi tihchian la ni lo mah se pound maktaduai 15 bawr vel tura ngaih a ni. Basti hian kum thum chhung atan contract a ziak ang a, a contract thar hi Bayern-a a contract neih lai nen a danglam lo - kum khatah pound maktaduai 7.2 a hlawh ang. German midfielder hi kum 30-a upa a ni tawh a, August 1 khian kum 31 a tling dawn.

Germany captain hi Man­chester United-a German player khel hmasa ber tur a ni.

Schweini an ui

Bayern chief executive Karl-Heinz Rummenigge chuan, "Schweinsteiger chungchangah Manchester United nen kan inrem ta. Bastian hi team tana player pawimawh a nih avangin a chhuak tur hi pawi kan ti takzet a ni. Hlawhtlinna tam tak min chanpui a, a career tawp lamah chona hmachhawn a duh a, a duhna hi kan remtih sak a ni. Thutlukna thlak turin theihtawp chhuah mah ila kum 17 chhung kan bulah a awm tawh a, a thutlukna hi kan zah sak a ṭul a ni," tiin German midfielder chungchang a sawi.

French midfielder Franck Ribery chuan Schweinsteiger a chhuak dawn tih an hriat khan team pumpuiin hrehawm an tih thu a sawi chhuak. Bayern Munich right back Philipp Lahm chuan, "Kum hnih chhung Stuttgart tan ka khel tih loh chu Bayern leh ram tan kan khel dun char char a, hun harsa leh hun hlimawm kan tawng dun a, a chhuak tur hian minti lungngai hle a ni. Amaherawhchu chona thar a hmachhawn dawn a, a thutlukna hi kan pawm sak a ngai a ni," tiin Schweini chhuak tur a ui thu a sawi.

Bayern Munich ṭantu zingah manager Pep Guardiola demtu an tam hle. Germany hi mahni hnam indah sang thiam tak an ni a, Spanish manager Pep luh hnuah Germany starting eleven-a tel chiang Toni Kroos an chhuah tawh a, Schweini hi pahnihna a ni. Bayern midfield-ah German player Sebastian Rode, Joshua Kimmich, Mario Gotze leh Gianluca Gaudinho te la awm mah se hnam dang midfielder Javi Martinez, Xabi Alonso, Thiago Alcantara (Spanish) bakah an player thar Brazilian Douglas Costa ten ro an rel dawn.

Bayern ṭantu ruhkawl ten German player awm reng laia Pep-a'n hnam dang a ring zawk hi an hrethiam lo a, chuvangin Spanish manager hian nomawi hmangin supporter tih lungawi a ngai tawh ang, chhuanlam dang a nei thiang lo.

Germany boss a ṭawngchhuak

World Champion Germany coach Joachim Low chuan, "Basti hi hruaitu ṭha bik a ni a, world class player a ni a, Manchester United tiamin a team hmachhawn tawhah chuan a ṭhat zia a pholang zel. Louis van Gaal-a'n tawp chin nei loa a duh thu a hria a, thil tum sang tak a neih bawk avangin England a chona thar hmachhawn hi a duh a ni. Bayern leh Bundesliga tan chuan a chhuak tur hi channa nasa tak a ni," tiin a captain chu a fak hle.

Schweinsteiger hi Euro 2016-a Germany player pawimawh tur a nih avangin ram tan chuan a khelh tamna tur club a zawm hi a ṭha zawk. United manager Louis van Gaal hian 2009-2011 chhung khan Bayern Munich a enkawl a, Dutch manager hnuaiah Schweini hian hmun pawimawh tak a chang.

Transfer hmabak

Real Madrid-a David de Gea a chhuah chuan United-in Real Madrid keeper Keylor Navas chu Spanish keeper manah chhiar tel an tum niin sawi a awm a, Atle­tico Madrid keeper Jan Oblak leh Ajax keeper Jasper Cillessen te hming a lang tel bawk.

United-in Matteo Darmian an la lut tawh a, central defender lak luh an la tum. Real-in Sergio Ramos chhuah an phal hmel loh avangin Argentine Nicolas Otamendi an melh a, Valencia chhiarna pound maktaduai 36 chuan an ngam lo ang.

Midfield-ah Schweini la lut tawh mah se French midfielder Morgan Schneiderlin lak luh an la tum tho. United-in pound maktaduai 20-in an dawr a, Saints manager Ronald Koeman-a'n pound maktaduai 25 a phut thung.

Vawiin hian America-a tour nei turin United an chhuak dawn a, captain Wayne Rooney chiah striker rintlak an nei. Robin van Persie a chhuah ngei a rinawm takah chuan striker pakhat tal an la lut ngei dawn. Dutch manager Van Gaal chuan Spurs forward Harry Kane duh ber mah se Tottenham chairman Daniel Levy rilru hmin hmasak a ngai - a beiseiawm loh niin an sawi.

United-in player dang an melh a ngai a, Bayern-in an for­wardThomas Muller chhuah tir an tum lo. Pound maktaduai 50 velin Paris St-Germain striker Edinson Cavani lak theih dan a awm a, Napoli striker Gonzalo Higuain leh Aston Villa centre-forward Christian Benteke te chu lak harsa tur niin a lang lo. Belgium striker Benteke leichhuah theihna (buyout clause) hi pound maktaduai 32.5 a ni a, United hian buyout clause zat hi an phawrh ngam chuan Villa tan a dan theih lo ang.