A chung berah Milan awm zel

AC Milan chu Serie A hmahruaitu an nih chhunzawm zel. Inrinni zan khan an mikhual Torino 2-0 a hnehin point liin an sang fal a, nizana Inter Milan leh AS Roma inkhel result a zirin an hmahruaina zat hi a la danglam thei thung.

Milan hian counter attack aṭangin Rafael Leao hmangin minute 25-naah goal hmahruai an khung, chawlhlawk hmain Franck Kessie-a'n an goal hnihna khung belhin nuamsa takin an chak.

Mikhual Torino tan defender Ricardo Rodriguez-a'n freekick aṭangin goal bar a pet per. Simone Verdi-a'n Milan midfielder Sandro Tonali a tih tluk vanga penalty an chawi tur erawh VAR hman a nih hnuah sutsak an ni thung. 

Milan tan point thum hmuh a lawmawm a, chanchin lawmawm dang an neih chu Zlatan Ibrahimovic a inkhel thei leh tawh. Swede striker hian coronavirus a kai a, chumi hnuah a hliam leh bawk - November 22 hnua a vawi khatna ni turin hun tawp dawnah luhtir a ni.

Italian manager Stefano Pioli chuan, "Inkhel ṭhenkhatah vanduai chang awm mah se theihtawp kan chhuah miau chuan vanneih ni a herchhuak ṭhin. Ka naute kha hnehna chan chakin an tuihal, hmalam an thlir zel ang," a ti.