United-in Darmian an phochhuak

Zirtawpni khan Ita­lian defender Matteo Darmian chuan private jet-in Manchester airport a thleng a, medical nei tura Carrington panin medical a paltlang. Inrinni khan Manchester United-in Darmian hi club jersey nen an phochhuak.

Kum 25-a upa Dar­mian hian kum li chhung Old Trafford-a cham turin contract a ziak a, club hian ṭha an tih chuan a contract hi kum khat dang an pawtsei thei bawk. Italian defender chungchanga Torino leh United inremna hi official-a puanzar ni lo mah se pound maktaduai 12.7 bawr vela ngaih a ni.

Darmian chuan, "Manager hlawhtling Louis van Gaal nena kan thawk dun tur hi a phurawm takzetin ka hria," tiin a sawi.

Italian defender Dar­mian hian Torino tan match 146 a khel a, an ram Italy tan vawi 13 a khel tawh bawk.

Dutch manager Louis van Gaal chuan, "Matteo thiam bikna chu defence dinglam a ni a, position dangah a khel thei a, vei lamah pawh a hman theih a ni. Defender chak tak a ni a, attack a pui thei a, Premier League-ah game khelh dan a ran avangin Matteo theihna neih ang hi a ṭangkai ang," tiin an player thar tur a fak.