Stoke-ah Van Ginkel leh Given

Season thar atan Stoke City an ṭang a, Zirtpawni khan Chelsea aṭangin midfielder Marco Van Gikel chu loan-in an la lut a, Aston Villa veteran keeper Shay Given chu free transfer-in an la lut bawk.

Hetihlai hian Stoke City-in chanchin duhawm lo pakhat an nei a, club record fee pound maktaduai 12 man Xherdan Shaqiri lakluh an remtih zet hnuin Inter Milan winger hi Potters lamin in report tura an beisei hunah a in report loh avangin an la lut leh dawn lo.

Swiss winger Shaqiri hi Ningani thleng kha a club thar tur Stoke City-ah in report tura hun pek a ni a, an hun pek chhung a bawhpelh avang hian Stoke hi an inhnukdawk ta a ni.

Kum 22-a upa Van Ginkel hian season khat chhung cham turin Stoke City hi loan-in a zawm a, kum 2013-a Vitesse aṭanga Chelsea a zawm hnuin Blues tan hian vawi li chiah a la inlan.

Stoke City boss Mark Hughes chuan, "Marco hi kan team min tichak lehzual turin a ṭangkai dawn a ni," tiin Chelsea rawlthar an la thei chu a lawm hle.

Hetihlai hian Shay Given chuan The Potters tan hian season hnih chhung khel turin contract a ziak a, Manchester City-a a pu hlui Mark Hughes nen an inkawp leh dawn a ni.

Hughes chuan tawnhriat nei ngah Given an la lut thei chu lawmawm a tih thu sawiin, "Professional player dik tak a ni a, field chhung mai bakah a pawn lam thlenga kan ṭangkaipui theih tur player a ni. Tawnhriat a ngah tawh avangin dressing room lamah pawh a ṭangkai dawn a ni," tiin Given chungchang a sawi.

Ireland tana vawi 129 lai inlan tawh Given hma hian Stoke chuan tun nipui transfer-ah defender Philipp Wollscheid, goalkeeper Jakob Haugaard leh striker Joselu te an lo la tawh a, an goalkeeper Asmir Begovic erawh Petr Cech a hmunruak luah turin Chelsea lamah a kal ngei a rinawm thung.

Bosnia-Herzegovina inter­national Begovic tan hian Chelsea chuan pound maktaduai 8 thehchhuah an inhuam a, Stoke boss Mark Hughes chuan a keeper hian Chelsea a zawm ngei a rin thu a lo sawi tawh bawk a ni.