Villa tan Delph-a rinawm

Tun hnaia Manchester City nena nasa taka an sawi zawm Fabian Delph chuan Aston Villa-ah a cham chhunzawm zel tur thu a sawi.

January thlaa Villa Park-a kum li leh a chanve cham tura contract thar ziaktu Delph chuan, "Villa hi ka chhuahsan dawn lo, he hmunah hian ka la cham rih dawn a, Premier League season ṭan hun ka nghakhlel tawh hle a ni," a ti.

Zirtawpni khan Kum 2009 a Leeds United aṭanga Villa zawmtu Delph hian City-ah medical a nei dawn nia sawi a ni hman. Manchester City player hlui Villa zawmtu Micah Richards-a'n Delph-a'n City chungchang a zawt nia a sawi thu thuthang a awm hnu phei chuan Delph hian City hi a zawm ngei dawn niin a lang a, mahse tunah amah ngeiin thu a tichiang ta a ni.

Premier League club Villa-in pre-season training camp Portugal-a an neih tur pawha zin chhuak ve lo Delph hi season hman zawh takah khan Villa player pawimawh ber pawl a ni a, Premier League-a an inhamtanna tura player ṭangkai niin FA Cup final an luhna kawngah pawh a thawhhlawk hle.