CONCACAF Gold Cup US chakna Dempsey goal khat

Kar hmasa Inrinni CONCACAF Gold Cup Group A match hnihna inkhelah Haiti tan Mohun Bagen forward Sony Norde a inlan a, mahse Clint Dempsey goal khat thun hmangin US an chak.

US-in an match hmasa bera khel player pasarih ngawt thlak mah se Gillette Stadium-ah an chungnung zawk a, an phu ang ngeiin point thum hmuin group hmahruaitu an ni.

Inkhel dangah Honduras leh Panama te chu goal khat ve ve khungin an inhneh tawk thung. Inkhel ṭan aṭanga minute 21-na leka Luis Tejada goal khung chu hun tawp hma minute kua chauh a awm tawh tiah Andy Najar-a'n a sut.

Point ruk hmua group hmahruaitu US leh point hnih hmutu Panama te hian knockout round an lut chiang tawh.

Jamaica tan Austin

Hun tawp dawna Rodolph Austin goal khat tauh luh hmangin Jamaica chuan Canada hnehin CONCACAF Gold Cup Group B hmahruaitu an ni.

Compass Stadium-a inkhelah hian Canada goalkeeper Kyriakos Stamatopoulos a chet ṭha tak zet a, goal ngei tura ngaih vawi li ngawt a dang. Amaherawhchu minute 92-na a Austin tauh ṭha zet chu dang zo loin a team te point a hlawhchhuahpui zo lo.

Group B inkhel dangah Costa Rica leh El Salvador te chu goal khat ve ve khungin an inhneh tawk thung. Inrinnia Houston hmuna inkhelah hian Costa Rica tan second half a Bryan Ruiz goal khung chu hun tawp hma chiahin Dustin Corea-a'n sut vein point khat ve ve an hmu.

Inkhel vawihnih an hmachhawn tawh aṭanga point li hmutu Jamaica leh point hnih hmutu Costa Rica te hian knockout round an lut chiang tawh.