Paul Pogba lakluh ka duh - Laporta

Joan Laporta chuan tun thla tawpa Barcelona president atana thlan tlin a nih chuan Nou Camp-ah Paul Pogba lakluh a tum tur thu a sawi. Laporta hian kum 2003-2010 inkarah khan club president hna hi a lo chelh tawh a ni.

Barcelona presi­dential candidate Laporta chuan Pogba agent Mino Raiola nen inlaichinna ṭha tak an neih avangin a beiseina leh duhna hi a hlawhtlin ngei a ring hle nghe nghe.

Juventus midfielder duhlai chungchang sawiin Laporta chuan, "Pogba-a agent Raiola nen hian ṭhian inkawmngeih tak kan nih avangin kan inbe pawh reng a, tun nupui transfer chhung hian Pogba hi kan la lut duh a nih chuan a harsain ka ring lo," tiin a sawi.

Mahse, season hmasaa Serie A leh Italian cup-a Juve cham­pion pui tu France midfielder hi chuti maia lak awlsam chua ni dawn lo tih a chiang, a tlem barah Barca hian lak an duh a nih chuan pound maktaduai 80 bawr vel chu an sen a ngai ang.

An elpui Real Madrid chungchang sawi telin Laporta chuan, "Tun hnaiah Sergio Ramos a nghing tih kan hria, ani hi kan hnenah lo kal duh pawh nise ka la lut lo ang. A chhan chu Gerard Pique kan nei miau a lawm. Santiago Bernabeu-ah fan ten Iker Casillas an auel tih ka hriatin a pawi ka ti. He hi chu Carles Puyol-a Camp Nou a auel ang chauh a nih avangin ka hrethiam thei lo, a mawi lo takzet," tiin president a thlan tlin a nih hma aṭangin Real a bei nghal.