Newcastle United player thar Georginio
Premier League club Newcastle United chuan PSV Eindhoven aṭangin midfielder Georginio Wijnaldum chu pound maktaduai 14.5-in an la lut.
Netherlands international Wijnaldum hi Magpies-in an boss thar Steve McClaren hnuaia an player lakluh hmasa ber a ni a, club neitu Mike Ashley-a'n kum riat Magpies neitu nihna a chelh chhunga a player lakluh manto ber a ni bawk.
St. James Park-a kum nga cham tura contract thar ziaktu Georginio a lawm a, Netherlands tana vawi 13 lai lo inlan tawh midfielder chuan, "Newcastle United player ka ni thei hi ka lawm hle a, tun hi ka tan chuan club dang zawmna hun ṭha anih mai bakah Newcastle hian min duh ve tak taka vangin ka hun ṭha neih hi ka bawhpelh phal lo a ni," a ti.
Kum 24-a upa Rotterdam khawchhuak Georginio chuan sawi chhunzawmin, "He hmunah hian Holland lam chhuak player an lo awm nual tawh avangin ka tlangnel nghal turah ka ngai a, inkhelh thuai thuai ka chak tawh hle a ni," tiin Magpies tana inlan thuai thuai a chak tawh thu a sawi.
Georginio hi July 14-a Newcastle United-in US lama pre season tour an neih turah tel nghal tura beisei a ni.
Newcastle boss thar McClaren pawh a lawm a, England boss hlui chuan, "Gini kan la lut thei hi ka lawm hle a, club-in hmasawn kan tum zia tilangtu a ni. Kum lamah pawh la valai tak a ni a, Newcastle tan player ṭangkai tak a ni thei ang," tiin a player thar chu a fak.