Zverev leh a coach Ferrer inṭhen

Alexander Zverev chuan 2021 season bul ṭan duh duhawm lo a nei. World number 7 hian a coach David Ferrer nen an thawhdunna an tih tawp thu social media lamah a tarlang.

German tlangval hian nikum laihawl vel aṭang khan Spanish coach Ferrer hi a coaching team-ah a telh. Player a nih laia world number 3 ni thei kaihhruaina hnuaiah hian a vawi khat nan Grand Slam final a lut.

Mahse US Open final inkhel hmuhnawmah set hmasa pahnih a la chungin Dominic Thiem a ngam lo. Cologne Open-ah nomawi chhawiin Paris Masters-ah final lut mah se beisei angin season a hmang ṭha tawk lo.

Zverev chuan, "Kan hun hman dun leh a lak aṭanga ka thil zir te avangin David chungah lawmthu ka sawi. Hun harsa tak kara hmalam min panpuitu a ni a, a kal zelna turah duhsakna ka hlan," a ti.

Kum 23 mi Zverev hian season bul ṭan nan Melbourne khawpuiah ATP Cup a khel dawn a, chumi hnuah Australian Open a khel zui ang - Grand Slam hmasa ber hi February 8 aṭanga khelh tur a ni ang.