Wimbledon Grand Slam lalnu Serena Williams

Inrinni zan khan Serena Williams chuan Garbine Muguruza hnehin Wimbledon-ah a champion. Kum 33-a upa Williams hi he inelna a champion thei upa ber a ni a, a vawi ruk champion-na a ni.

Centre Court-a inkhelah American super star hian darkar khat leh minute 23 chhungin Spanish star chhuak thar Muguruza lakah 6-4, 6-4 in hnehna a chang.

Tennis player-te châk ber leh tum ber chu Grand Slam tourna­ment a champion a ni. A bik takin khawvela tennis tourna­ment upa ber kum 1877 aṭanga khelh ṭan tawh Wimbledon a champion hi a ni ṭhin. Heng player-te duhthusam zawng zawng tawngtu chu Williams hi a ni.

Tunah hian khawvela Grand Slam tournament pali Australian Open, French Open, Wimbledon leh US Open champion nomawi chu Serena hian a kawl kim vek. Kum 1988-a Steffi Graf hnuah Serena chauh hi hetiang ti leh thei awmchhun ala ni.

Open Era bikah Williams hian Grand Slam vawi 21 a chawi tawh a, ani aia chawi tam awmchhun chu vawi 22 chawi thei Steffi Graf chauh a ni. Williams hi Grand Slam single-ah vawi 21 zet a champion tawh bakah double-ah vawi 13 zet a champion tawh bawk a ni.

Seeded 20-na Muguruza hian Grand Slam final vawi khat a khelhnaah hian a zam bik loin inkhel bul a ṭan ṭha zawk. Williams service hmasa bar chhuhsakin set khatnaah 4-2 in hma a hruai nghal. Mahse, game hnuhnung pali ngawt hi William-i'n rawn la zawnin 6-4 in a rawn lehthal chiang hle.

Set hnihnaah Serena service na tak tak mai chu Muguruza hian a chai thei lo; 5-1 ngawtin Williams hian hma a hruai fal. Mahse, kum 21-a upa Muguruza chuan Serena service vawi hnih chhuhsak ve lehin beiseina a rawn insiam a, amaherawhchu 6-4 bawka set la lehin Williams a chak chiang hle.

Thla leha kum 34 tling tawh mai tur Williams chuan,"He hmuna ka champion-na hnuhnung ber chu kum 2012 daih tawh kha a nih avangin tun huna ka champion leh thei hi min hruaitu Pathian chungah ka lawm hle. Wimbledon champion nih hi chu ka naupan lai aṭang tawha ka lo suangtuah ṭhin a nih avangin a lawmawm dan hi a dang bik hle. Ka hlim tak zet a, min ṭantu zawng zawngte chungah lawmthu ka sawi e," tiin a sawi.

Kum 21-a upa Muguruza chuan, "Ka naupan deuh laiin Williams inkhel hi ka lo en tawh ṭhin a, thiam ka tiin ani ang nih theih ve hi ka chak ṭhin. Tunah ani nen final kan khel thei hi a mak zawk hial a, hnehna chang zo lo hi a pawi ka tiin ka ui em em a. Amaherawhchu ka thlen chinah ka lawm tho mai," tiin a sawi.