Sania leh Hingis an champion
Wimbledon 2015 hmeichhe double-ah India nula Sania Mirza leh Martina Hingis te ṭangkawp chuan Russian duo Ekaterina Makarova leh Elena Vesnina te ṭangdun chu inkhel inhnehtawk takah 5-7, 7-6, 7-5 a hnehin an champion.
India hmeichhe zingah tun hmain Wimbledon champion thei an la awm ngai lo a, Inrinni zana Mirza te an champion chiah khan Indian tennis-in bung thar kaiin Hyderabad nula Mirza chu hmeichhe double champion hmasa ber a ni ta.
Kum 34-a upa Hingis hi chuan Wimbledon-ah hian tawnhriat a lo nei nual tawh a, kum 1996 khan Helena Sukova nen an lo champion tawh bakah kum 1998 khan Jana Novotna nena inkawpin an lo champion tawh a, kum 1997 khan single-ah a lo champion tawh bawk.
Indian tennis star Mirza hi Grand Slam single-ah la champion chiah lo mah se Mixed Double-ah chuan Australian, French leh US Open-ah te vawi khat ṭheuh a lo champion tawh a ni.
Kum 28-a upa Mirza chuan, "England a inkhel ni mah ila Indian tam takin min ṭawiawm avangin ka lawm tak zet. Kan result hi kei leh India tennis tan chuan chanchin lawmawm tak a ni. Ka ṭanpuinu hi tawnhriat ngah tawh leh natnain a hneh theih loh a nih avangin hetiang dinhmun hi min thlenpui a ni," tiin a sawi.