Independence Day Celebration Football Tournament
Mizoram Premier League awm hmaa club football ngaihnat hlawh ber ang hiala sawi ṭhin Independence Day Celebration Football Tournament chu July 30 khian ṭan a ni dawn.
Team 8 chauh
MFA lam chuan ADFA first division club pariatte tel theih turin Independence Day Football Tournament hi a rel zet a; nimahsela ADFA First Division Club hruaitu intelkhawm chuan ADFA transfer hun a la zawh loh avangin club an la indin mumal thei lo tiin an harsatna tawh an sawi.
I Day Football Organising Committee-in ADFA first division club-te a hrethiam a, MPL club pariatte chauhin inelna an hmachhawn ang.
Inelna kalphung
I Day Football champion-in Rs 1,00,000 dawngin pahnihnain Rs 50,000 an dawng ang.
MPL club pariatte hi group hnihah ṭhen an ni. Group khata awmte an inkhel kual chhuak vek ang a, a sang pahnihin semifinal an lut dawn a ni.
Group pahniha awm turte pawh fel an ni tawh a; Group A-ah champion lai Dinthar FC bakah Chanmari FC, Mizoram Police FC leh Bethlehem Vengthlang FC-te an awm. Group B lamah nikuma pahnihna Aizawl FC bakah Chanmari West FC, Luangmual FC leh Reitlang FC-te an awm.
MPL4 inpuahchahna
I Day Football 2011 khan MPL sawi rik a la ni lo a, Mizoram chhung club-te inpuahchahna a ṭha tawk lo. Meghalaya club Shillong Lajong leh Royal Wahingdoh ten final an khel a, Lajong an champion.
Kum 2012 erawh MPL season hmasa ber atana inpuahchahna a nih avangin tualchhung club-te'n an la thutak hle. Phai lam aṭanga chah luh ONGC, Mumbai leh Oil India ten group stage an paltlang zo lo. Champion Mizoram Police hi hun rei zawk MPL1 hmahruaitu an ni a, season tawp lama an chetsual vangin Dinthar FC an champion.
Kum 2013-ah MPL leh first division club ten an khel a, final-ah Chanmari FC leh Dinthar FC te inkhelin RG Stadium-ah mipui an ṭhahnem hle. I Day Football 2013-ah Chanmari FC an champion a, MPL2-ah an champion zui bawk.
Nikum I Day Football-ah Aizawl FC an khel ṭha a, semifinal-ah champion lai Chanmari FC hneh mah se final-ah Dinthar FC-in an barakhaih - knockout football ti ngaihnawmtu a ni. MPL3-ah I Day Football-a hmuhnawm ber Aizawl FC an champion.
Tun ṭum I Day Football hi MPL4 atana inpuahchahna ṭha tak a ni dawn. MPL club ten coaching staff an thlak danglam avangin player an siksawi nasa lehzual a, chu chu I Day Football 2015 ngaihnawmna tur a ni.
Aizawl FC-in foreigner player lak ngheh an la nei lo a, I League club thar ni mah se club dang chungah an awm kher lo ang. Champion lai Dinthar FC-in coach bakah player tam zawk an chhuah tir a, club hlun an ni nachungin player aṭanga chhut chuan club thar an ni.
Bethlehem VT, Chanmari FC leh Reitlang FC te transfer-ah thawm an nei lian a, Chanmari West FC, Luangmual FC leh Mizoram Police FC te an la reh hle. I Day Football-ah team pariat nihna tak tak a lang ang.