Anfield-a cham chhunzawm tur Skrtel

Liverpool defender Martin Skrtel chuan Anfield-a cham chhun­zawm zel turin contract thar a ziak. Liverpool-a kum khat dang cham tura contract la nei sa Skrtel-a contract sei zawng hi tarlan a ni lo.

Kum 30-a upa Skrtel hian kum 2008 khan Russian club Zenit St-Petersburg aṭangin Liverpool hi a zawm a, Reds tan match 293 khel tawhin season hman zawh takah khan match 48 a khel a, Liverpool tlarhnung innghahna ber a ni.

Slovakia inter­national Skrtel-a'n contract thar a ziah thu hi Zirtawpnia Liver­pool-in an captain thar atana Henderson an puan hnu lawkah puanchhuah a ni.

Tun hnaia Turkish club Antalyaspor zawm tur anga an sawi Ronaldinho chuan an ram lam hawiin Brazilian club Fluminense a zawm. Kum 35-a upa Ronaldinho hian a khelh mekna Mexican club Queretaro-a a contract neihlai titawpin Rio De Janeiro club hi free-transfer in a zawm a ni.