Chanmari an tho chhuak leh ta

GIG Motors MPL12-ah Chanmari FC-in nimin tlai khan Mizoram Police chu Aron Vanlalrinchhana leh Michael Lalbiaksanga te goal hmangin 2-0 in an hneh. Rochhingpuia'n Lawngtlai club MLS FC laka an mualphona chu insiamṭhat nan a hmang a, I Day Football champion hian MPL champion an beisei leh ngam tawh ang.

Hrem vanga MLS hmachhawn thei lo Aron-a goal nen a rawn kir a, Cherhlun tlangval hian minute 40-naah mual vei lamah Lalrinzuala Khiangte leh Lalbiakhlua (Hlutea) te bumin a ke dinglamin mawi zetin a khung. Second half-ah Tlangmawi tlangval Michael-a'n minute 60-naah dinglam aṭanga Teka ball vawrhluh chu a tauh lut.

Chanmariin inkhel an thunun a, Police keeper F. Lalmuanawma khel ṭha lo se chuan goal tam zawk an khung ang. Chutihrualin Police pawhin chance ṭha an hlah a, R. Malsawmtluanga cross ṭha bik chu Lalbiakhlua'n (Biaktea) six yard box chhung aṭangin a hlah.

Chhinga hote 2-0 in an chak a, pahnihna dinhmun an sawhngheh. Police erawh an chak zawh loh avangin relegation zone-ah an awm chhunzawm. October 2-3, 2025 hian CYLA Ground-ah MPL12 round 10 khelh a ni dawn a, Lawngtlai mipuiin Chanmari FC leh Aizawl FC inkhel an hmu dawn a, an vannei hle.