Mizoram semifinal an lut

Mizoram chuan nimin khan Subroto Cup vawi 64-na quarterfinal-ah CISCE 3-0 in an hneh a, semifinal an lut. Dr. Ambedkar Stadium, New Delhi-a inkhelah hian Mizoram tan Maulkhang rawlthar Henry Lalhnehzova'n goal hnih khungin injury time-ah Tlangnuam rawlthar Benjamin Lallawmawma'n freekick aṭangin a khung belh.

Junior (U17) inelna quarterfinal inkhel dangah Army Boys-in Goa penalty shootout-ah 4-3 in an hneh a, CBSE-in APS 4-0 in an sawp. Match hnuhnung berah Lakshadweep leh Kerala an inkhel a, result kan hre hman lo.

Semifinal hi vawiina khelh lehnghal tur a ni a, Mizoram hian vawiin tlai hian Lakshadweep leh Kerala inkhela chak zawk an hmachhawn dawn. Inkhel hi SportsCast India YouTube channel-ah a en theih ang.