Zanin dar 7:00-ah football hmuhnawm: Saikhamakawn mipui nge tam Lawngtlai mipui?

GIG Motors MPL12-ah zanin dar 7:00 hian Saikhamakawn leh Lawngtlai club MLS FC te an inkhel dawn. Season ṭan hma khan MPL kaithar pahnih inkhel tur hian heti tak hian ngaihven a hlawh pha ang tih ring pha an awm kher lo ang. Tunah erawh thil thlen dan tur a hmuh thiam theih tawh a, RG Stadium-ah zanin hian inkhel entu an ṭhahnem dawn.

Vawiin tlai dar 3:00 hian table chung bera awm Aizawl FC leh table mawngphaha awm SYS FC te an inkhel bawk dawn. MPL hi Zonet Rinhnim, Empai leh YouTube (Member only)-ah te en theih a ni.

Phuba lak duhna?

Saikhamakawn hian MPL hian ṭan hmain I Day Football-ah final an thleng a, MPL-ah erawh Kanan FC an hneh loh hnuah MLS FC lakah 3-1 in an chak lo. M Lalpektluanga chuan Lalsangzuala Hmar team lakah hattrick a siam a, Saikhamakawnin Lawngtlai club laka chak loh hi an la na hle.

MLS hi inelna ṭan hmain relegate leh mai tura ngaih ni mah se season chanve khelh meuh chuan semifinal khelh beiseiawm zingah an tel tawh. Saikhamakawn hian MLS laka an chak lo hi la na lutuk tur an ni lo - I League club Chanmari pawhin Lawngtlai club hi an hneh lo.

Mahse, Saikhamakawn coach hi a head coach-na hnuaia MPL club pathum champion pui tawhtu Lalsangzuala Hmar a ni a, Lawngtlai club laka chak loh hi a pai dam thei lo. SKK hian match hnuhnung berah SYS FC 2-0 in an hneh a, Lawngtlai club laka chak ngei tumin residential camp an nei tlang a, an inpuahchana thlir hian chak ngei an tum tih a chiang hle. Chutihrualin MLS hian match hnuhnung pathumah Kanan, SYS leh Chanmari te an hneh a, an phur lai tak a nih vangin coach Peka hote hian an hneh nawn thei zawk.

Tu nge tam zawk?

MPL12-ah Saikhamakawnin ṭantu an nei ṭha ber a, Lawngtlai nena an inkhel tur hi quarterfinal ang hiala chhal theih a nih avangin entu an ṭhahnem lehzual dawn. Saikhamakawnin an au dan bik an nei ṭan a, khuang an nei ring ṭha a, RG Stadium hi an tual chaina hmun a ni der tawh.

Lawngtlai lamin ṭantu an nei ṭha ṭhin lo a, mahse Aizawla Lawngtlai mi ṭhahnem tak an awm tih erawh a chiang. Chanmari FC an hneh ṭumin ṭantu an nei pangngai a, an inkhawrh khawm ṭhat chuan Aizawla inkhelh tur ni mah se Saikhamakawn an el phak lohna chhan tur a awm lo. District nei thei an ni a, tun hi district anga ṭan hun pawh a ni thei ang. Lawngtlai hian MPL12 round 10 an thleng dawn tih hriat a ṭha a, MLS an chet ṭhat bawk avangin MPL ngaihventu pawh an pung nasa hle.