Boruak ṭang tak karah India-in Pakistan an hneh
Asia Cup super four-ah Pathianni zan khan India leh Pakistan an inkhel a, group match ang thoin an inchibai duh lo a, harsatna nei loin Men in Blue chak mah se inkhel boruak erawh a ṭang ṭha hle.
Dubai-a inkhelah India-in vawm hmasak thlangin, Shaheens-in 171/5 runs an siam a, over 18.5-ah India-in 174/4 runs siamin, wicket rukin an chak. Pakistan-in zanin dar 8:00 hian Sri Lanka an hmachhawn dawn a; September 24, Nilaini zanah India-in Bangladesh an hmachhawn thung ang.
A en tlak ta
Group stage-ah Pakistan-in India an ngam lo deuh a, 127/9 runs chauh an siam avangin a hmuhnawm pha lo. Inkhel chanchin aiin in chibai duh lo chanchinin sawi zui a hlawh zawk a, super four-ah Pakistan tho bat hmasa lehin target mawi hnai tak an vawi chhuak.
Sahibzada Farhan (58) leh Fakhar Zaman (15) ten bul an ṭan ṭha a, chutihrualin over hmasa berah Abhishek Sharma-a'n Farhan-a ball vuak thlauh lo se chuan chanchin a dang thei ang. Pakistan run rate a ṭha a, Zaman-a thih danah an lungawi lo - wicketkeeper Sanju Samson-a'n a man hmain ball-in lei a si hmanah an ngai.
India fielder-te an che ṭha tawk lo a; Abhishek bakah Kuldeep Yadav leh Shubman Gill ten man theih tura ngaih an thlauh vek. India chhuanvawr Jasprit Bumrah a che ṭha lo a, 45 runs a pek bakah wicket a la lo.
Pakistan-in bul ṭan ṭha mah se a tawp an khar ṭha tawk lo a, chutihrualin hun tawp lama Faheem Ashraf-a'n ball riat leka 20 runs a siam zarah 171/5 runs an siam pha tho.
India vuak hun
Pakistan opener Farhan-a'n half century a siam lawm nan a bat chu silai anga kengin mipui lamah a kap a, inkhel boruak a tih ṭan phah hle. India bat hun a inṭan a, Abhishek Sharma (74) leh Shubman Gill (47) ten Pakistan bowler-te an sawisa a ni ber a, an ball vawm chu kil tinah an vaw chhuak.
Inkhel boruak a ṭang a, inmelh rum leh inchhang deuh sak sak hmuh tur a awm. Pakistan pacer Haris Rauf-a'n India ṭantute hmaah a kutzung ṭang paruk a pholang a, hei hian a lantir chu Pakistan sipaiten India thlawhna paruk an kap thla tihna a ni. Operation Sindoor-ah khan Pakistan lamin India jet fighter paruk kap thlain an inchhal a, finfiahna a awm lo thung.
Khelmual chhung lamah captain Suryakumar Yadav-a'n run khat pawh siam lo mah se Tilak Varma-a'n thi loin 30 runs a siam a, over 18.5-ah 174/4 runs siamin hnehna an chang.
Mipui lawm SKY
India captain Suryakumar Yadav-a'n an intawn hmasak ṭumin Pakistan captain leh player-te a chibai duh lo a, hei vang hian SKY-a chet dan hi India ram mipuiin an fak. Chutihrualin in chibai duh lo boruak hian super four inkhel a tinung sawt.
Inkhelh banah SKY hian Pakistan hliamah chi phu belhin, "India leh Pakistan rilvary chungchang hi min zawt tawh suh u. Match 15-20 te inkhel ila, inhnehtawk ila, inelna chu a awm ngei kan ti thei ang. Mahse, tunah chuan 10-0 nge 10-1 vel a ni a, inelna a awm tawh lo. Batting a ni emaw bowling emaw pawh ni se, Pakistan aiin kan ṭha zawk ve ve," tiin a ṭawng ngeiawm thiam hle.