Beidawng lo Verstappen a inlar

Season a hman ṭhat loh avangin Max Verstappen dinhmun a tlahniam hman hle a, tunah erawh mi bik a nihna a lantir chho leh mek - Pathianni zana tlan zawh tak Italian Grand Prix-ah hnehna a chang.

Baku City Circuit-a intlansiakah, champion lai Verstappen tan harsatna a awm lo - Dutch tlangval hian intlansiak thunun chungin hnehna a chang a, championship hmahruaitu Oscar Piastri a phak lohna chu point 69-ah a sawr zim.

Red Bull car khalhtu Verstappen hian season kal laiah vawi li hnehna a chang tling ta chiah a, nikum angin tlan ṭha chiah lo mah se tun hnaiah a insiamṭhat avangin nomawi hum a la beisei a, intlansiak pasarih lai an la hmabak avangin champion tur a chiang lo.

A zawna vawi li champion thei Verstappen chuan, "Kei leh ka team tan chuan chawlhkar nuam leh duhawm tak a ni, thil tum sang leh ṭha tak kan nei reng a, chumi tihlawhtling tur chuan hmalam kan pan zel, tun hi a tawpna tur pawh a la ni dawn lo," a ti.

Intlansiak vawi khatah point 25 a hmuh theih a, sprint race a awm tel bawk avangin an dinhmun hi a la danglam nasa thei dawn. Season tawp lam boruak a sang dawn tih a chiang tawh, tawnhriat nei Verstappen hi dah bo a remchang rih lo.

Azerbaijan Grand Prix-ah hian, driver championship hmahruai mektu Oscar Piastri chu an tlan kualna hmasa berah a chesual nghal a, amah ang bawka McLaren car khalhtu Lando Norris chu pasarihna niin, an inthlauhna chu point 25 a ni.

Ocotober 5, Pathianni zanah Singapore Grand Prix an tlan leh dawn a, inelna a hmuhnawm chhunzawm ang.