Barcelona-in Real an um zel

Spanish champion Barcelona-in an nomawi humhim an tum tih pholangin, hmahruaitu Real Madrid an um zel a, Pathianni zan khan an mikhual Getafe chu 3-0 in an hneh - Ferran Torres chuan goal hnih khungin, Dani Olmo chuan goal khat a thawh bawk.

Catalan club hian league match an khelhah tlawm la nei lo mah se, vawi khat draw an nei a, match nga khelh tawha la chak vek, hmahruaitu Real chu point hnihin an phak lo mek.

Barca tan Torres chuan minute 15-na lekah goal hmahruai a khung a, he goal luh theih nana backheel hmanga Olmo siamsak chu a mawi takzet - minute 34-naah Raphinha siamsak a khung belh zui.

Catalan club-in second half-ah 2-0 in hma an hruai a, chak tur a chiang titih der! Getafe tana Javi Munoz-a'n hun duhawm tak a khawhral hnuah Barca bawk an inlar a, bench aṭanga luhtir Marcus Rashford siamsak chu Olmo chuan goal-ah a chantir.

Rashford hi Champions League-a Newcastle United laka goal hnih khung hlim a ni a, an league match khelh leh hmasak berah bench-ah dah zui a ni. Spanish media-te chuan training-naa a tlai avangin coach Hansi Flick-a'n a hrem niin an sawi.

Mahse, Flick chuan, "Ni thum emaw, ni li danah emaw match kan nei zel a, hei vang hian squad siksawi reng a ngai," a ti a, English forward bench-a a dah chhan chu inhremna a nih loh thu a sawi.

La Liga hi zaninah khelh chhunzawm lehnghal tur a ni a, zan dar 1:00-ah hmahruaitu Real chuan Levante an lenchilh ang.