Inter Milan an chak ve ta

An match hnuhnung pathuma an tlawm hnuah Inter Milan chuan chak ni hmel an hmu ve leh ta - Pathianni zan Serie A inkhelah Inter hian an mikhual Sassuolo chu 2-1 a hnehin point thum hlu tak an hlawh chhuak.

Sa Siro-a inkhelah, mualneitu Inter Milan tan hian Federico Dimarco chuan goal hmahruai a khung. Italian wing-back hian Petar Sucic-a siamsak chu cool deuhin a khung a, a team chu hma a hruaipui.

Goal dang erawh kan hmu zui mai lo - hun tawp dawn lamah Sassuolo defender Tarik Muharemovic chuan anmahni lamah a tilut a, hemi hnu lawk hian Walid Cheddira chuan sut ṭhen ve mah se goal dang a lut zui hman tawh lo.

Inter Milan coach Cristian Chivu chuan, "Goal dang khung leh vat theihna remchang kha kan nei a, mahse kan tihlawhtling mai lo. Duh ang thlap chuan khel chhuak lo mah ila hnehna chan hi thil ṭha tak a ni.

"Kan tan chuan point thum hmuh kha a hlu a, hei hian inrintawkna pawh min siamsak ngei ang. Tun aia ṭha leh rang zawk pawh khan kan la khel thei a, kan match lehpekah chuan kan ṭha leh zual tawh ngei ang," tiin a sawi.

Inter Milan hian Serie A match li aṭangin point ruk an hmu a, khelh zat inangah hmahruaitu Juventus chuan point 10 an hmu thung. Nizan khan champion lai Napoli an inlan a, an chak a nih chuan a chung berah an lawn kai ang.