Chak thei lo Atletico

Champions League-a Liverpool ngam lo hlim Atletico Madrid chu La Liga lamah pawh an chak zo lo a, an mikhualna ramah Real Mallorca nen 1-1 in an inhnehtawk - tun season-a league match nga an khelh tawhah vawi khat chiah an la chak!

Atletico hian minute 12-na lekah hmahruai theihna remchang an nei a, Mallorca captain Antonio Raíllo chuan Dávid Hancko-a shot chu a kutin a lo dang a, penalty a chawi.

Liverpool laka hliam vanga inlan thei lo Julian Alvarez a lo pen chhuak a, mahse, Atletico striker chhuanvawr pet hi Mallorca keeper Leo Román chuan a lo dansak - Roman-a chet ṭhat zan a ni a, a hnuah pawh Mallorca hi a chhan mawlh mawlh a ni ber.

Minute 79-naah Atletico vanduaina belhchhahin a awm a, bench aṭanga luhtir Alexander Sorloth chu Raillo laka a chet dan hlauhawm tak avangin hnawhchhuah a ni.

Mahse, a hnu minute sarihah Atletico tan Conor Gallagher chuan goal hmahruai a khung a, Atletico ṭantuten an chak dawn emaw an ti hman - an beisei ang erawhin thil a kal lo chiang hle.

Minute 85-naah Vedat Muriqi chuan Mallorca tan a khung ve leh a, Atletico an chak zo lo. Diego Simeone-a naute hian league match nga khelh tawhah vawi khat chiah hnehna la changin, vawi khat an tlawm a, vawi thum draw an nei.