United chakna Captain Tominay
Manchester United-in Inrinni zan khan FA Cup third round khel turin Watford an mikhual a, captain atana ruat Scott McTominay goal khung hmangin 1-0 in an chak.
Ole Gunnar Solskjaer-a'n Thawhlehni zana Burnley an hmachhawn zawhah Liverpool an khelhpui lehnghal dawn tih a hria a, FA Cup-ah hian player chhawr rim ṭhenkhat a awltir.
Man United-in League Cup semifinal-ah Manchester City an hneh lo a, Norwegian manager Solskjaer-a'n player pakua zet a thlak. Keeper Dean Henderson leh Tominay te chauh an lut nawn a, bul ṭantute hi Henderson; Brandon Williams, Axel Tuanzebe, Eric Bailly, Alex Telles; Tominay, Donny van de Beek; Daniel James, Juan Mata, Jesse Lingard leh Mason
Greenwood te an ni.
Minute ngana lekah Telles-a corner pet chu Scott McTominay-a'n a tauh goal a, United-in goal khung hma mah se goal dang hmuh tur a awm tawh lo. Championship club Hornets defender Adam Masina goal khung tur chu keeper Dean Henderson-a'n a dang ṭha a, United nuam sain an chak lo.
Watford-in Man United tlarhnung an chhaih buai a, Joao Pedro-a'n a hun ṭha neih keeper Henderson zawna tauh bakah Ken Sema-a'n goal zawnah a tauh lo. United defender Eric Bailly chu inhliam vangin first half injury time-ah Harry Maguire-a'n a thlak.
Solskjaer-a'n goal bawh a nat theihna turin Marcus Rashford leh Anthony Martial te luhtir mah se hun tawp lamah erawh an goal neihsa an venhim theih nan Nemanja Matic a luhtir a ṭul thung.
Manchester United manager Solskjaer chuan, "Scott hian hruaitu ni turin engkim a nei a, a theihna enchhin nan captain armband ka hren tir a, a khelh danah ka lungawi. Club academy aṭanga inzir chhuak a nih avangin Manchester United player awm dan tur hi a thisenah a bet tawh a ni," tiin goal khungtu a fak.
Captain chungchang sawiin McTominay chuan, "Manager-in ka captain tur thu min hrilh khan mumang emaw ka ti hial. Helai hmunah hian kum nga ka nih aṭangin ka awm ṭan a, kum 18-19 chhung ka awm tawhna club-a ka captain thei hi ka tan chuan chawimawina sang tak a ni," tiin a lawm thu a sawi.