Punjab lakah Aizawl FC an vanduai

Tun season I League chu Inrinni aṭang khan Kolkata-ah khelh ṭan a ni a, Aizawl FC chuan an match hmasa berah Roundglass Punjab 1-0 in an hneh lo. 

Kalyani Municipal Stadium-ah hian Punjab tan Ningthoujam Pritam Singh-a'n minute 18-naah goal awmchhun a khung a, Mizo club-in an chhanletna an nei lo. Mizo club-in point thum hlawh theihna tur hun ṭha an bawhpelh a, chutihrualin AFC hian Covid-19 positive vangin player paruk an chhawr thei lo tih hriat a ṭha.

Aizawl FC-in 4-1-4-1 formation nen bul an ṭan a, Punjab lamin Spanish midfielder Joseba Beitia te an kawl avangin fimkhur taka bul an ṭan hi a mak hran lo.

Mizo club-in chance ṭha an nei hmasa zawk a, Nigerian forward Princewill Emeka Olariche-a'n fing zeta a kheng chu Brandon VL Remdika tan ball ṭha ni mah se Roundglass defender a tla zep hman.

Minute 18-naah left back pahnih khelh theih loh avangin mualsira pawh chawp Lalrammawia chuan PC Dinpuia ball pek chu hmun himah a pet chhuah hmain Pritam Singh-a'n a tibuai hman a, Manipur forward hian box pawn aṭangin ṭha zetin a pet goal.

Pritam-a'n a pet ṭha a, chutihrualin Aizawl vanneih ṭum chu ni se referee Priyobarta Singh-a'n foul a ham ang. Besei angin sum hmang tam Roundglass Punjab an ṭha lo a, Mizo club pawhin an ngam tial tial. Second half ṭan chiahah F. Lalremsanga rawn lutin 4-4-2 formation an hmang a, goal nawr pawh na sawt mah se goal hmuh tur a awm loh avangin point an hlawh chhuak zo lo.

Aizawl FC assistant manager Gosen Rammawia chuan, "Kan tihsual a ni. Kan khingpui Roundglass Punjab hi ṭha turah kan ngai a, fimkhur takin player kan rem a, a tir aṭangin huai hret ilang chuan result a danglam thei ang. Ka thiam loh a ni," tiin Vanglaini a hrilh a, chak loh chhuanlam a siam lo.

Amaherawhchu Aizawl FC hian chhuanlam tur ṭha an nei a, Covid-19 vangin an duh angin player an rem thei lo. Coach Henry Stanley Rozario awm loh vanga thachhangdawltu ber Lalsangzuala Hmar chu Kolkata a thlen hnuah Covid-19 a kai tih hmuhchhuah a ni a, Sanga bakah hian a kaihhnawih player R. Malsawmtluanga, MC Malsawmzuala, C. Lalrosanga, K.

Lalmalsawma (Buanga), H. Lalremruata leh Lalfelkima te inkhung hran a ngaih avangin an inlan thei lo.

Left back position-a awm thei Buanga leh Felkima awm lo hi channa lian tak a ni a, MS-a leh MC-a te awm se an goal nawr a na thei bawk ang. Aizawl FC-in January 20, Nilaini tlai dar 2:00-ah Gokulam Kerala an hmachhawn ang. Mizo club khingpui tur Gokulam hian Chennai City an hneh lo.

Gokulam hian Denny Antwi hmangin minute thumna lekah khung mah se Chennai City-in Elvedin Skrjelj leh Vijay Nagappan te hmangin an lehthal. Kerala club-ah hian Mizo tlangval Laromawia leh Churanchanpur tlangval Sebastian Thangmuansang ten bul an ṭan a, Zodingliana Ralte erawh bench-ah a awm tluan thung.