Gladbach-in Bayern an lehthal

Borussia Monchengladbach-in Bayern Munich lakah goal hnih chhuah hmasa mah se an tlawm duh lo a, Jonas Hofmann goal hnih leh Florian Neuhaus goal khat hmangin an lehthal.

Borussia Park-ah Bayern-in Robert Lewandowski penalty hmangin hma an hruai a, Neuhaus-a handball vangin Bavarians hian penalty an hmu.

Gladbach-in Denis Zakaria hmangin siphurh sut teuh mah se minute 26-naah Leon Goretzka-a'n Leroy Sane nen 'wall pass' hmanga tlarhnung an ṭhiah hnuin Bayern goal hnihna a khung.

Bavarians-in goal hnih an khung avanga an dinhmun ṭhatna chu tlarhnung pawp vangin awmze nei loah a chang zui. Lars Stindl-a ball pass ṭha chu Hoffmann-a'n minute 36-naah a khung a, player pahnih bawk hian Bavarians tlarhnung ṭhiatin Hoffmann-a'n minute 45-naah siphurh a sut.

Second half-ah Gladbach an che ṭha zui a, minute 48-naah hmahruaina goal Neuhaus-a'n a khung. Goal hnih khungtu Hofmann chu a siamtu a ni ta zawk a, penalty chawitu Neuhaus-a'n a tihsual siam ṭhat nan chakna goal a khung. 

Bayern-in siphurh sut tumin na takin an nawr let a, hun tawp hma hretin Niklas Süle ball tauh chu goalline aṭangin Matthias Ginter-a'n a dang a, Gladbach an ṭang tluan hram.

Hansi Flick-a hoten tun season-ah Hoffenheim leh Borussia Monchengladbach an hneh lo a, Glabach hian season liam taa Bavarians an hneh tawh bawk avangin Flick-a enkawl vawi hnih hneh thei hmasa ber an ni.

Flick hian Bayern a enkawl hnuah vawi li hneh loh tawng tawh mah se a nomawi chawi zat a la tam zawk. Bayern hian Flick-a hnuaiah nomawi panga Champions League, Bundesliga, DFB Pokal, UEFA Super Cup leh DFB/DFL-Supercup te an chawi tawh a ni.