Zomuana'n goal 10 a khung ta

GIG Motors MPL12-ah Aizawl FC-in table mawngphaha awm SYS FC 2-0 in an hneh a, I League club tan Zomuansanga leh C. Zomuanpuia ten an khung. Khawbel tlangval Zomuana'n MPL12-ah goal 10 a khung tawh a, top scorer a ni.

Nimin inkhelah SYS FC-in first half-ah I League club chelh thei mah se, Lalawmpuia Sailo awm loh vangah a ngaih theih. Second half-ah OmOma luhtir a ni a, Aizawl FC-in inkhel thununin minute 58-naah Zomuana hmangin an vannei a. Minute 78-naah defender Muantea'n corner kick aṭangin Aizawl FC tan a khung belh leh bawk.

Zomuana hian goal 10 khung turin match riat a mamawh a, match ruk a zawnin goal a khung tawh. Khawbel tlangval hian season khata goal khung tam ber record siam turin goal li chiah a mamawh. Aizawl FC pawhin point 25 an hmu tawh a, league round-a point hmu tam ber record siam thei dinhmunah an ding mek. R. Lalruatfela hote hian Lawngtlaiah Chanmari an hmachhawn dawn a, CYLA Ground-ah I League club pahnih inkhel en tur a awm ang.