Chak kim thei awm chhun Napoli
Serie A match li an khel kim a, champion lai Napoli chu chak kim vek thei awmchhun an ni - Antonio Conte naute hian Thawhṭanni zan khan Pisa 3-2 a hnehin point thum hlu tak an hlawh chhuak.
Diego Armando Maradona Stadium-a inkhelah, mualneitu Napoli tan Billy Gilmour chuan chawlhlawk hmain goal hmahruai a khung, box chhunga a ball hmuh chu a pet lut a, chawlhlawk laiin an dinhmun a ṭha phawt.
Pisa lamin penalty an hmu, defender Sam Beukema-a'n a kuta ball a khawih fuh vanga penalty a chawi chu M’Bala Nzola chuan a khung a, si phurh sut nan a hmang, a hnuah Leonardo Spinazzola goal ṭha bik kan hmu.
Italian wingback Leonardo Spinazzola hian ama sual chhuah liau liauin a khung, box pawn hla deuh tak aṭangin goal kilah a pet lut pawp a, goalkeeper Adrian Semper tan dan phak a ni tawh lo.
Kevin De Bruyne-a ball pass mawi bik kan hmuh zawh rualin Naples lamin an goal thumna an khung, striker Lorenzo Lucca chuan angle zim angreng tak aṭangin a pet lut a, hun tawp dawna Lorran khungin result a tidanglam phak tawh lo a ni.
Conte-a'n hliam vangin srtiker palian Romelu Lukaku chu December thleng a chhawr thei dawn lo, mahse Lukaku awm loh karah Rasmus Hojlund chuan a hmun ruak a hnawh khat a, ani bakah hian Lucca chuan a hna a rawn hlen chhuak bawk.
Serie A champion Napoli coach Antonio Conte chuan, "Kan inkhelh hma khan ka naute hnenah Pisa chanchin hi chiang takin ka hrilh, tharum an ngahin, inkhel kalhmang an tidanglam thut thei tih pawh chiang takin ka hrilh lawk vek a ni.
"Kan rin lawk ang ngeiin mikhual thlen harsa tak an ni a, a tir aṭang khan hlauh vak an nei lo. An tharum hmangin min bei nasa a, a tawp thleng khan inthlahdah thei miah loin min siam," tiin a sawi a, point thum an hmu thei chu lawmawm a tih thu a sawi bawk.
Napoli hian point 12 hmuin hma an hruai mek a, anmahni hnaih bertu Juventus aiin point hnihin an sang zawk - an elpui hautak ber tura ngaih Inter Milan chuan point ruk chauh an la hmu thung, season tir a la nih avangin an dinhmun erawh a la danglam chho ngeiin a rinawm.